თბილისის მერის, კახა კალაძის თქმით, თბილისში მიკროავტობუსების ავტოპარკი უნდა განახლდეს, რადგან მათ "რესურსი ამოწურული აქვთ". ამის შესახებ მან დღეს, პირველ ოქტომბერს ფეისბუქ ლაივის დროს ისაუბრა.

კალაძის განცხადებით, მერია კომპანია თბილისის მიკროავტობუსს დაავალდებულებს, პარალელურ პროცესში ჩაანაცვლონ მიკროავტობუსები. მანვე აღნიშნა, რომ კომპანიის წარმომადგენლებს რამდენჯერმე შეხვდა და "ისინი წინააღმდეგები არ არიან":

"არის რამდენიმე შეთავაზება: ფორდის ახალი მიკროავტობუსების შემოყვანა კომპანიის მხრიდან და საქართველოში წარმოების დაწყება".

კახა კალაძემ მაგალითის სახით წარმოადგინა ლურჯი ფერის მიკროავტობუსი, რომლის მსგავსიც, მისი თქმით, შესაძლოა, საქართველოში აწარმოონ. კალაძე ამბობს, რომ მიკროავტობუსს ერქმევა "ელვა" და ჯამში 30 მილიონის ოდენობის ინვესტიცია ჩაიდება.

თბილისის მერმა აღნიშნა, რომ საქართველოში წარმოებულ ტრანსპორტს მიესალმება, თუმცა ჯერ დაელოდება ფორდის შეთავაზებასაც.