"ეს იყო იაფფასიანი, დაგეგმილი პროვოკაცია. ძალიან შეგნებულად გამოუშვა, როგორც ჩანს, ჩინჩალაძემ და მისმა კლანმა ეს არარაობა, ყოველთვის მათი მონა ზარდიაშვილი პროვოკაციის მოსაწყობად. მეტი მათ არაფერი ეხერხებათ, მეტი მათ არაფერი იციან", — ასე აფასებს დეპუტატი ეკა ბესელია პარლამენტში მომხდარ დაპირისპირებას. ბესელიას თქმით, გასაუბრებაზე მყოფ უზენაესი სასამართლოს მოსამართეობის კანდიდატ მირანდა ირემაძეს, რომელიც "კლანის რჩეულია" დეპუტატებმა რთული კითხვები დაუსვეს, ვანო ზარდიაშვილი კი მის "გადასარჩენად" მიუშვეს.

ბესელია ამბობს, რომ ზარდიაშვილის "პროვოკაციას გასცა პასუხი" და ბოდიშის მოხდას არ აპირებს. მისი თქმით, ყველა ვინც "ასე მოიქცევა, იგივე პასუხს მიიღებს".

"ამ არარაობასთან არაფერი საქმე არა მაქვს. მას, რა თქმა უნდა, თავი არ უნდა გაუყადრო ადამიანმა, მაგრამ არც იმას არ ვაპირებ, ის შეურაცხყოფები რაც მესმოდა, უკაცრავად ამ სიტყვისთვის, გავატარო", — განაცხადა ბესელიამ.

პარლამენტში, სადაც უზენაესი სასამართლოს მოსამართლეობის კანდიდატს უსმენდნენ, ეკა ბესელიასა და ვანო ზარდიაშვილს შორის კონფლიქტი მოხდა. ზარდიაშვილმა მოსამართლეების მოსმენის დროს ახსენა სიტყვები "ბესელიას მორალი", რის გამოც ბესელია მას ხელით შეეხო.