პრემიერ-მინისტრმა გიორგი გახარიამ თქვა, რომ ევროკავშირის სადამკვირვებლო მისიის მანდატის გასაფართოვებლად, ხელისუფლებამ ყველაფერი უნდა იღონოს. ამის შესახებ პრემიერმა ევროკომისარ იოჰანეს ჰანთან ერთად გამართულ ბრიფინგზე ისაუბრა:

"ყველაფერი უნდა გავაკეთოთ, რათა ევროკავშირის სადამკვირვებლო მისიის მანდატი აღსრულდეს მთელს ოკუპირებულ ტერიტორიაზე, რამაც ხელი უნდა შეუწყოს ჩვენი მოქალაქეების უსაფრთხოების დაცვის უზრუნველყოფას".

გიორგი გახარიამ აღნიშნა, რომ სადამკვირვებლო მისიის მანდატის საკითხი მათი შეხვედრისას ერთ-ერთი განსახილველი საკითხი იყო, ღრმა და ყოვლისმომცველი სავაჭრო ხელშეკრულებისა და უვიზო მიმოსვლის საკითხებთან ერთად.

ევროკომისარმა იოჰანეს ჰანმა ბრიფინგის დაწყებისას აღნიშნა, რომ ადასტურებს პრემიერის განცხადებას, რომ მათ განიხილეს ევროკავშირთან თანამშრომლობის გაღრმავების პერსპექტივები. ამასთან, ევროკომისარს თავის სიტყვაში კონკრეტულად არ უსაუბრია სადამკვირვებლო მისიის მანდატის გაზრდაზე.

ევროკავშირის სადამკვირვებლო მისია ახორციელებს 24 საათიან პატრულირებას საოკუპაციო ხაზთან. მისიაში 200-მდე დამკვირვებელი მუშაობს ევროკავშირის სხვადასხვა წევრი ქვეყნიდან. მათი მანდატი ვრცელდება საქართველოს ხელისუფლების მიერ კონტროლირებად ტერიტორიაზე, თუმცა აფხაზეთისა და ე.წ. სამხრეთ ოსეთის დე-ფაქტო ხელისუფლების წარმომადგენლები დღემდე არ აძლევენ მათი კონტროლის ქვეშ მყოფ ტერიტორიებზე შესვლის უფლებას.

საქართველოს დღეს, 16 სექტემბერს ევროპის სამეზობლო პოლიტიკისა და გაფართოების საკითხებში ევროკომისარი იოჰანეს ჰანი ეწვია. ვიზიტის ფარგლებში ის საქართველოს განათლების მინისტრს, მიხეილ ბატიაშვილსა და თბილისის მერს კახა კალაძეს შეხვდა.