პატრიოტთა ალიანსის დეპუტატი, ემზარ კვიციანი ამბობს, რომ პარლამენტის შენობასთან აქტივისტები თავს დაესხნენ. ესაა ვერსია, რომელიც მან ჟურნალისტებთან ამ ინციდენტის დასრულების შემდეგ გააჟღერა, თუმცა საპირისპიროს ადასტურებს მედიების მიერ გავრცელებული ვიდეოკადრები.

"ტაქსი ვერ ამოვიდა ზემოთ და მოვდიოდი ქვემოთ. თავს დამესხნენ ეგენი სასტვენებით, ცხოვრებით და მთელი ამბავი, დამიწყეს ლანძღვა-გინება... [მე] თავი დავიცავი", — უთხრა ჟურნალისტებს მან.

კვიციანი გააღიზიანა ტაბულას ჟურნალისტის ნათქვამმა იმის შესახებ, რომ მის მიერ აქტივისტებზე ფიზიკური ძალადობა კადრებშია ასახული.

"კანონის დარღვევა თუ რამე არის, გამოჩნდება. მე არავისთვის არ დამირტყია... მე ჩემგან ვჯიკაობდი და ეხლა პროვოკაციულ იმას ნუ იძლევი, არადა გატრიალდი და წადი. თქვენ ხართ ყველაზე დიდი მოღალატეები, ასეთი ჟურნალისტები. თქვენ გამიყიდეთ კოდორიც და სამშობლოც", — უთხრა აგრესიული ტონით პარლამენტის დეპუტატმა ტაბულას ჟურნალისტს.

ემზარ კვიციანი პარლამენტის შენობიდან მას შემდეგ გავიდა, რაც #სირცხვილია-ს ორგანიზატორებმა შენობასთან უმრავლესობის დეპუტატების განსასახიერებლად ცხვრები მიიყვანეს. მას აქტივისტები რუსეთის მონასა და მოღალატეს ეძახდნენ.

პარლამენტის დეპუტატმა ემზარ კვიციანმა პოლიციელსა და აქტივისტებს ფიზიკური შეურაცხყოფა მიაყენა. TV პირველის მიერ გავრცელებულ კადრებში ჩანს კვიციანის მიერ მოქნეული ხელი როგორ ხვდება პოლიციელს და როგორ ურტყამს ის ფეხს აქტივისტს.