საქართველოში ავიაკომპანია Ryanair-ის ფრენების განრიგი არ შეცვლილა. როგორც აეროპორტების გაერთიანების ხელმძღვანელმა, გიორგი ჩოგოვაძემ განაცხადა, კომპანიის ვებგვერდზე ტექნიკური ხარვეზის გამო გარკვეული დროით რეისები სრულად არ ჩანდა. მისივე თქმით, ამ ეტაპისთვის პრობლემა აღმოფხვრილია.

ნეტგაზეთის ინფორმაციით, ავიაკომპანიის ვებგვერდზე ბილეთების ყიდვა უახლოეს რეისზე მხოლოდ 2020 წლის აპრილიდან იყო შესაძლებელი.

Ryanair თბილისიდან და ქუთაისიდან ფრენებს ნოემბერში დაიწყებს. ფრენები პირველ ეტაპზე თბილისიდან მილანის, ხოლო ქუთაისიდან მარსელისა და ბოლონიის მიმართულებით შესრულდება. ეკონომიკის მინისტრის, ნათია თურნავას ინფორმაციით, 2020 წელს კომპანია ცხრა ახალ მიმართულებას დაამატებს.