რუსთავი 2-ის ყოფილი გენერალური დირექტორი, ნიკა გვარამია ამბობს, რომ რუსთავი 2-დან ნებისმიერი გადაცემის წამოღება შეუძლია და საავტორო უფლებაზე ვერავინ შეედავება. ამის შესახებ მან #სირცხვილიას გადაცემაში განაცხადა, სადაც ჰკითხეს შეუძლია თუ არა ახალ მთავარ არხზე რუსთავი 2-ის რეიტინგული გადაცემების წაღება.

"ქიბარ ხალვაშიც მედავებოდა ლოგოზე, მხოლოდ იმიტომ, რომ მიზეზი ყოფილიყო ჩვენი დაყადაღების და, აი, სტრასბურგის სასამართლოს აქედან მოკითხვას ვუთვლი. დათაგვა მინდა ამ ყველაფერზე სტრასბურგის სასამართლოსი, ნახოს მისი გადაწყვეტილებით როგორი ცელი და სიკვდილის კალო დატრიალდა საქართველოში. წარმატებები მიუკერძოებელ სტრასბურგს", — განაცხადა ნიკა გვარამიამ.

ქიბარ ხალვაშის მიერ რუსთავის 2-ის გადაფორმებიდან ერთი თვის თავზე არხიდან გაათავისუფლეს საინფორმაციო სამსახურის უფროსი ნოდარ მელაძე. შვებულებიდან დაბრუნების შემდეგ კი გაათავისუფლებენ საზოგადოებრივი და პოლიტიკური ტოქ-შოუს მთავარ პროდიუსერს გიორგი ლაფერაშვილს; პოლიტიკური გადაცემების წამყვანებს გიორგი გაბუნიასა და ეკა კვესიტაძეს და გასართობი გადაცემის ავტორსა და წამყვანს ნანუკა ჟორჟოლიანს. ახალმა დირექტორმა, პაატა სალიამ მათი გათავისუფლების მიზეზად "ინტერესთა კონფლიქტი" და "შიდა ომები" დაასახელა.

პროტესტის ნიშნად არხი დატოვეს კურიერის წამყვანებმა, დიანა ჯოჯუამ, პაატა იაკობაშვილმა და მიშა სესიაშვილმა.