ტელეწამყვან ნანუკა ჟორჟოლიანის ინფორმაციით, ის; საინფორმაციო სამსახურის უფროსი, ნოდარ მელაძე და ჟურნალისტი გიორგი გაბუნია რუსთავი 2-დან გაუშვეს. ამის შესახებ ჟორჟოლიანი Facebook-ზე წერს.

"ნოდარ მელაძე გაუშვეს. ჰოდა, მოსვლამდე ვინც ველის გასუფთავება მოითხოვა და ამ ყველაფერზე გაივლის და მოვა, ომს ელოდოს. საჯაროს, აქვე ფეისბუქზე. უი, და მეც გამიშვეს. უი, გაბუნიაც გაუშვეს. კარგია, რომ მხოლოდ ორ სუბიექტს შორის იყო დავა", — წერს ჟორჟოლიანი.

განახლება: ნოდარ მელაძის გათავისუფლება არხის გენერალურმა დირექტორმა, პაატა სალიამ ბრიფინგზე დაადასტურა. მისი თქმით, ნოდარ მელაძესთან ერთად ინტერესთა კონფლიქტის მიზეზით კიდევ რამდენიმე თანამშრომელს ათავისუფლებს.

რუსთავი 2-ის საქმე

ადამიანის უფლებათა ევროპულმა სასამართლომ რუსთავი 2-ის საქმეზე ევროპული კონვენციის არცერთი მუხლის დარღვევა არ დაადგინა. ეს ნიშნავს, რომ ძალაში დარჩა საქართველოს უზენაესი სასამართლოს გადაწყვეტილება, რომლის მიხედვითაც არხი ქიბარ ხალვაშს ეკუთვნოდა. გარდა ამისა, სტრასბურგის სასამართლომ საქართველოს უზენაესი სასამართლოს გადაწყვეტილების აღსრულების შეჩერების დროებითი მექანიზმიც გააუქმა. სწორედ ამ მექანიზმის გამო ვერ გადაიფორმა 2017 წელს ქიბარ ხალვაშმა რუსთავი 2.

სტრასბურგის სასამართლოს გადაწყვეტილების გამოცხადებიდან რამდენიმე საათში ქიბარ ხალვაშმა რეესტრს ტელეკომპანიის წილების გადმოფორმებაზე მიმართა, რაც რეესტრმა მალევე დაუკმაყოფილა. 18 ივლისიდან რუსთავი 2-ის 100%-ს მფლობელი ქიბარ ხალვაშია. ამასთანავე, ქიბარ ხალვაშმა დირექტორის თანამდებობიდან მოხსნა ნიკა გვარამია და თავისი ადვოკატი, პაატა სალია დანიშნა. რუსთავი 2-ის ჟურნალისტები აცხადებენ, რომ ქიბარ ხალვაში ხელისუფლების გეგმას ახორციელებს და კრიტიკული მედიის დახურვა სურთ.