პროექტის იკითხე პოლიტიკა ფარგლებში, ჰაინრიჰ ბიოლის ფონდმა გამოაქვეყნა ინტერვიუ ქართული ოცნების ახალ სახესთან, ირინა ფრუიძესთან.

ჟურნალისტის შეკითხვაზე, იმაზე, რომ მის საარჩევნო პროგრამაში არაფერია ნათქვამი იმ გენდერულ დისბალანსზე, რომელიც კარიერული წინსვლის გზაზე ქალებსა და მამაკაცებს ხვდებათ და მაღალ თანამდებობებზე, კაცები უფრო ხშირად გვხვდებიან და ასევე იმაზე, რომ ერთსა და იმავე თანამდებობაზე ქალების ხელფასი ხშირ შემთხვევაში მამაკაცების ხელფასზე გაცილებით დაბალია, ირინა ფრუიძემ უპასუხა, რომ ეს პრობლემა მთელ მსოფლიოში არსებობს და ამის მიზეზი ისაა, რომ ხშირად ქალი თვითონაა ნაკლებად გამბედავი:

"სამწუხაროდ მარტო საქართველოში არ არის ეს პრობლემა, მთელს მსოფლიოში იგივე მდგომარეობაა. მთელს მსოფლიოში პარლამენტარი ქალები მხოლოდ 23%- ს შეადგენენ. დაგეთანხმებით იმაში, რომ ქალები ნაკლებად გვხვდებიან გადაწყვეტილების მიმღებ პოზიციებზე, მაშინ როდესაც დაბალ რგოლებზე ისინი ბევრად მეტი არიან. აქაც კომპლექსური სამუშაოა საჭირო. ხშირად ქალი თვითონ არის ნაკლებად გამბედავი, ნაკლებად იცავს თავის პოზიციებს.

კანონით ამ ყველაფრის რეგულირების საჭიროებას ვერ ვხედავ. თუ განვიხილავთ კვოტირებას, ამაზე შეიძლება საუბარი. დადებითი ეფექტები ვიცით, მაგრამ აქვს ნეგატივიც: ბევრი ქალი და მათ შორის მეც, ამას პოზიტიურ დისკრიმინაციად განვიხილავთ. ასევე, ეჭვქვეშ დგება დემოკრატიის პრინციპი, რამდენად თანაბარი არჩევანი აქვს მოსახლეობას კვოტირების შემთხვევაში და კითხვის ნიშანს უსვამს კომპეტენციის საკითხსაც, იმიტომ მოხვდა ეს კონკრეტული ადამიანი პარლამენტში, რომ ქალია, თუ იმიტომ რომ კომპეტენტურია. ეს მსჯელობის საკითხია. შეიძლება დროებითი ეფექტისთვის შემოვიღოთ კიდეც, მაგრამ ხანგრძლივვადიანი შედეგისთვის ჩვენ განათლების, ეკონომიკის და სხვა დარგების განვითარება გვჭირდება".

ირინა ფრუიძე ქართული ოცნების პროპორციული სიის მეათე ნომერია.