თიბისი ბანკის დამფუძნებელი, ბადრი ჯაფარიძე ამბობს, რომ ბრალდების მხარე დაზარალებულს ვერ ასახელებს. სასამართლო სხდომის დასრულების შემდეგ ჯაფარიძემ განაცხადა, რომ საბოლოოდ, დაზარალებულები ის და მამუკა ხაზარაძე არიან.

"ბრალდებაში წერია, რომ თურმე მე და მამუკამ მივაცემინეთ სესხი ბანკს ისეთ კომპანიაზე, რომელსაც ეკუთვნოდა ეს სესხი. მერე ამ კომპანიამ გვასესხა ჩვენ ფული. ეტყობა ჩვენ ვიცოდით, რომ 2008 წელს რუსეთის არმია შემოიჭრებოდა და განსაზღვრული გვქონდა, რომ გაკოტრდებოდა მთელი საბანკო სისტემა და ჩავვარდებოდით უმძიმეს მდგომარეობაში. ამის შედეგად ზიანი მიადგა ბანკს. და ვინ იყო ბანკი? ბანკის 80 პროცენტი გვეკუთვნოდა მე და მამუკას. ანუ საბოლოო ჯამში დაზარალებული ვართ მე და მამუკა", — აღნიშნა ჯაფარიძემ.

დღეს, 26 ივლისს თბილისის საქალაქო სასამართლომ ფულის გათეთრების საქმეზე თიბისი ბანკის დამფუძნებლების მამუკა ხაზარაძისა და ბადრი ჯაფარიძის აღკვეთ ღონისძიებაზე იმსჯელა. სასამართლო თითოეულ მათგანს 700 ათასი ლარის გირაო შეუფარდა და ქვეყნიდან გასვლა შეუზღუდა.

მილიონ-მილიონ ლარის შეფარდების შუამდგომლობით სასამართლოს ბრალდების მხარემ მიმართა. დაცვის მხარე კი ბრალდებულებისთვის არასაპატიმრო აღკვეთის ღონისძიების გამოყენებას ითხოვდა.

ბადრი ჯაფარიძის თქმით, ბრადაუსაბუთებელია. მისივე განცხადებით, მსგავსი "აბსურდული ბრალდება" ქვეყნისთვის დამაზიანებელია.

"ეს არის წარმოუდგენელი უსამართლობა, რომელიც უტოლდება ბრალდებებს ბომბეიდან ლონდონამდე გვირაბის გათხრას... ფაქტია, რომ აქ არ არის სიმართლის დაგდენის ან სამართლიანობის გარკვევის სურვილი. აქ არის პირდაპირ, რომ ამ ორ ადამიანს პირდაპირ შევუზღუდოთ საქმიანობა და მივაყენოთ ზიანი, გამოვიყვანოთ წყობილებიდან".

თიბისი ბანკის საქმე

8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. მაშინ პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს და მასში თიბისის დამფუძნებლები და ამავდროულად სამეთვალყურეო საბჭოს თავმჯდომარე, მამუკა ხაზარაძე და მისი მოადგილე ბარი ჯაფარიძე ფიგურირებდნენ.

ამ საქმესთან დაკავშირებით 13 თებერვალს საქართველოს ეროვნულმა ბანკმა მათი ხელმძღვანელი თანამდებობიდან გადაყენება მოითხოვა. თიბისი ბანკში ამბობდნენ, რომ აპირებენ სამართლებრივი საშუალებები გამოიყენონ ბანკისა და აქციონერების ინტერესების დასაცავად.

21 თებერვალს მამუკა ხაზარაძემ და ბადრი ჯაფარიძემ თანამდებობები დატოვეს. ეროვნული ბანკში განაცხადეს, რომ ხაზარაძის წასვლას მიესალმებიან. მათი თქმით, ეს დადებითად აისახება ბანკის გამჭირვალობაზე.

გარდა ამისა, თიბისი ბანკმა ეროვნული ბანკის წინააღმდეგ სასამართლო დავა შეწყვიტა და განაცხადა, რომ მილიონიან ჯარიმას გადაიხდის. ამასთანავე, ბადრი ჯაფარიძე და მამუკა ხაზარაძე ეროვნული ბანკის წინააღმდეგ კერძო დავას აგრძელებენ.

თიბისი გრუპის 97%-მა ხაზარაძე და ჯაფარიძე ხელახლა აირჩია თავმჯდომარედ და მოადგილედ.

28 ივნისს გავრცელდა ინფორმაცია, რომ თიბისი ბანკის დამფუძნებლები მამუკა ხაზარაძე და ბადრი ჯაფარიძე თიბისის აქციების დაახლოებით 8%-ს დროებით გაასხვისებას აპირებენ. ამის შესახებ განცხადება ლონდონის საფონდო ბირჟაზე გამოქვეყნდა.

9 ივლისს მამუკა ხაზარაძემ განაცხადა, რომ აფუძნებს საზოგადოებრივ მოძრაობას. ხაზარაძის ინფორმაციით, მეგობრებთან და თანამოაზრეებთან, სხვადასხვა სფეროს პროფესიონალებთან ერთად სექტემბერში დააფუძნებს და მთავარი მიზანი ქვეყნის გაერთიანება და მისი დამოუკიდებლობის და თავისუფლების შენარჩუნება იქნება.

გაიგეთ მეტი: რა ვიცით თიბისის საქმეზე — ყველაფერი მოკლედ