პარლამენტის ვიცე-სპიკერი, თამარ ჩუგოშვილი ინფრასტრუქტურის მინისტრის, მაია ცქიტიშვილის განცხადებას გამოეხმაურა და აღნიშნა, რომ არ იცის ეს რა კონტექსტში იყო ნათქვამი.

22 ივნისს ეკა ბესელიამ რუსთავი 2-თან საუბარში განაცხადა, რომ ისევ პასუხგაუცემელია კითხვები, თუ ვინ არის ფარული ვიდეოკადრების ავტორი და მას აღარ აქვს იმედი, რომ საქმეზე გამოძიება დასრულდება. ბესელიას განცხადების საპასუხოდ კი ინფრასტრუქტურის მინისტრმა, მაია ცქიტიშვილმა თქვა, რომ ქართული ოცნებიდან წასულ დეპუტატ ეკა ბესელიას მხრიდან პირად ცხოვრებაზე საუბარი "უკვე დამღლელია".

გადაცემა რეაქციაში თამარ ჩუგოშვილმა თქვა, რომ ამ საკითხზე მაია ცქიტიშვილის პოზიცია არაერთხელ მოუსმენია და კადრების გავრცელებაზე მინისტრს შეშფოთებაც გამოუხატავს.

"ნამდვილად არ მგონია, რომ მაია ის ადამიანია, რომელსაც ის დამოკიდებულება აქვს, რომ რაღაცით დაიღალა. ანუ მე არ ვიცი ეს რა კონტექსტში იყო ნათქვამი. ალბათ, თვითონ ისაუბრებს ამაზე. ძალიან ბევრჯერ გვისაუბრია ამაზე, არავისზე ნაკლებ აღშფოთებული და შეწუხებული არ ყოფილა იმ მოვლენებით, რასაც ჰქონდა ადგილი", — განაცხადა ვიცე-სპიკერმა.

გარდა ამისა, მან თქვა, რომ ასეთი შემთხვევებისგან სახელმწიფომ მოქალაქეები უნდა დაიცვან, განსაკუთრებით კი ქალები, რომლებიც მსგავსი შეტევების ყველაზე ხშირი ობიექტები ხდებიან. ჩუგოშვილმა აღნიშნა, რომ მსგავსი დანაშაულის ჩადენისთვის ყველა დამნაშავე პირი უნდა დაისაჯოს.