შინაგან საქმეთა მინისტრს, გიორგი გახარიას რუსთავი 2-ის ჟურნალისტმა კითხვის დასმისას 20 ივნისის აქციის დაშლის დროს ნასროლი რეზინის ტყვია მიუტანა. თამარ ბაღაშვილმა გიორგი გახარიას ჰკითხა, თუ რატომ გამოიყენეს აქციის დაშლისას ისეთი საშუალება, რომელიც ადამიანის სიკვდილს იწვევს:

"მე, ბატონო მინისტრო, ვიყავი 20 ივნისის აქციაზე, როგორც ჟურნალისტი. მე ხელში არ მჭერია არანაირი იარაღი. ერთადერთი მეკავა მიკროფონი. არც აგრესიაზე გადავსულვარ სპეცრაზმის წინააღმდეგ. მე ვიდექი და ვასრულებდი ჩემს მოვალეობას... რატომ ხართ თქვენ ჯერ კიდევ თქვენს თანამდებობაზე, 20 ივნისის სისხლიანი ღამის შემდეგ? თქვენ ხომ იცით, რომ საქართველოში ამას არ პატიობენ? რატომ გვესროლეთ ეს ტყვიები, რომლის გამოყენებაც ადამიანების წინააღმდეგ არ შეიძლება?"

გიორგი გახარიამ ჟურნალისტს უთხრა, რომ ის თავისი პასუხისმგებლობით ზის დღეს იქ. გახარია აღნიშნავს, რომ არც ერთი რეზინის ტყვია, რომელიც აკრძალულია, არ გამოუყენებიათ. შინაგან საქმეთა მინისტრის განცხადებით, სპეციალური დანიშნულების სამსახურის თანამშრომლებს, საჭიროების შემთხვევაში, შეუძლიათ გამოიყენონ წყლის ჭავლი, ცრემლსადენი გაზი და რეზინის ტყვიები.

"არც ერთი ტყვია, რომელიც აკრძალულია კანონით, ან არ არის მსგავს ღონისძიებებში დაშვებული, არ იქნა გამოყენებული. ყველა იარაღის გამოყენებას აქვს პროტოკოლი, მის დარღვევა იწყებს რეაგირებას", — აღნიშნა გახარიამ.

მისი თქმით, მისმა თანამშრომლებმა მას შემდეგ დაიწყეს ძალის გამოყენება, რაც მოსახლეობის უსაფრთხოება და სახელმწიფო საფრთხის წინაშე დადგა.

"მე თუ გავხდი სისხლიანი ჯალათი, ესეც ჩემი ტვირთია, რომელსაც როგორმე იმისთვის, რომ ამ ქვეყანაში ყველამ ოდესმე გაიგოს, რომ სახელმწიფო ინსტიტუტებზე შეტევა არის შეუძლებელი ქვეყნის განვითარებასთან შეუსაბამო, ამ ტვირთს როგორმე ვატარებ", — თქვა გახარიამ.

20 ივნისის აქციის დაშლის დროს კლინიკებში 240 მოქალაქე გადაიყვანეს, რომელთაგან 80 სამართალდამცავი იყო. დაშავებულებიდან 2-მა თვალი დაკარგა, მათ შორის 18 წლის გოგომ, რომელიც, მისი დის თქმით, უბრალო გამვლელი იყო და აქციაში არ მონაწილეობდა. დაზიანებები მიიღეს 30-ზე მეტმა ჟურნალისტმა, მათ შორის იყვნენ On.ge-ს სამი თანამშრომელი.