ქართული ოცნების დეპუტატი ზაქარია ქუცნაშვილი ამბობს, რომ ის მზადაა პასუხისმგებლობის ასაღემად და არ ეშინია თანამოაზრეების დაკარგვის. ამავე დროს, იზიარებს საზოგადოების აღშფოთებას, როდესაც პარლამენტის თავმჯდომარის სკამზე რუსი დეპუტატი, სერგეი გავრილოვი დაინახეს. ამის შესახებ ქუცნაშვილმა ჟურნალისტის კითხვას უპასუხა, თუ რას იტყოდა ბიძინა ივანიშვილის განცხადების შემდეგ და დაემუქრებოდა თუ არა მას პარტიიდან გარიცხვა:

"ზაქარიას არასდროს არ შეშინებია, ჰქონოდა პოზიცია ის, რაც მიაჩნია, რომ არის სწორი. სულ მარტო ვიყავი 2004 წლის პარლამენტში, როცა დავუპირისპირდი ნაციონალურ მოძრაობას. რვა კაცი მედგა გვერდში მარტო. ახლა მე ვგრძნობ, რომ საზოგადოების დიდი ნაწილის აღშფოთება არის სწორი და ამიტომაც მოვიხადე ბოდიში".

დღეს, 20 ივნისს ქართული ოცნების დამფუძნებელი და თავმჯდომარე ბიძინა ივანიშვილი საკანონმდებლო ორგანოში განვითარებულ მოვლენებზე აცხადებს, რომ დაუშვებელია, პარლამენტში ოკუპანტი სახელმწიფოს წარმომადგენელი ხელმძღვანელობდეს რაიმე სახის ფორუმს.

"როგორც მატყობინებენ, ეს იყო პროტოკოლური შეცდომა, რომლის პოლიტიკური მნიშვნელობა, სამწუხაროდ, ორგანიზატორებმა ვერ გაითვალისწინეს, რასაც აუცილებლად უნდა მოყვეს შესაბამისი რეაგირება", — წერს ბიძინა ივანიშვილი.

მართლმადიდებელი საპარლამენტთაშორისო ასამბლეის ფარგლებში რუსი დეპუტატები საქართველოს პარლამენტში იყვნენ. დღეს, 20 ივნისს ასამბლეის წევრი, სერგეი გავრილოვი პარლამენტში, ირაკლი კობახიძის სავარძელზე დაჯდა. ეს ფაქტი გააპროტესტა ვიცე-სპიკერმა თამარ ჩუგოშვილმა და პრეზიდენტმა სალომე ზურაბიშვილმა. თავდაპირველად, უმრავლესობის წევრმა, ზაქარია ქუცნაშვილმა თქვა, რომ "სადღაც რუსს რომ დავინახავთ, არ უნდა გავნადგურდეთ", მოგვიანებით კი განმარტა, რომ "თუ საჭიროა, პოლიტიკურ პასუხისმგებლობას აიღებს".