ბიზნესმენი, ლევან ვასაძე შინაგან საქმეთა სამინისტროს მოუწოდებს, დაპატიმრების შემთხვევაში დეპუტატ გიგა ბოკერიასთან ერთად მოათავსონ ორკაციან კამერაში და "ცოტა ხანი ნუ შეიხედავენ". ამის შესახებ ვასაძემ ვიდეომიმართვაში განაცხადა.

"თუ დამაპატიმრებთ, ერთი პატივი დამდეთ, რა. იმედია, იმას მაინც მიხვდებით, რომ მე თუ დასაპატიმრებელი ვარ, მაშინ გიგა ბოკერიაც არის დასაპატიმრებელი, ვინც არის იდეოლოგი ამ არეულობის მცდელობისა. ერთადერთი თხოვნა მექნება, ორკაციან კამერაში ჩაგვსვით და ნუ შემოიხედავთ ცოტა ხანი. მერე მართლა გექნებათ ჩემი დაკავების ლეგალური მიზეზები. ამას ვამბობ ყოველგვარი იუმორის გარეშე", — თქვა ვასაძემ.

ვასაძეს ბოკერიამ TV პირველის გადაცემა დღის ამბებში უპასუხა. ბოკერიას განცხადებით, არ იცის, ეს ვასაძის მხრიდან სიმპათიის გამოხატვად ჩათვალოს თუ არა.

"რაღაც პროგრესი მაქვს, სხვები უბრალოდ ჩემ ციხეში ჩასმას ითხოვდნენ და ამას ჩემთან ერთად უნდა საკანში. ოღონდ, ეს სიმპათიის გამოხატვად უნდა ჩავთვალო თუ არა მისი მხრიდან, არ ვიცი ჯერ", — თქვა ბოკერიამ.