მას შემდეგ, რაც სავარაუდოდ მიხეილ სააკაშვილისა და ენმ-ს სხვა ლიდერების აუდიოჩანაწერი გავრცელდა, სუსმა დაკითხვაზე პარტიის ერთ-ერთი ლიდერი, ირმა ნადირაშვილი მოწმის სტატუსით დაიბარა.

სუსის წარმომადგენელმა ნადირაშვილის შესაბამისი უწყისი სახლში მაშინ მიუტანა, როდესაც მასთან ჟურნალისტები იმყოფებოდნენ, თუმცა ნადირაშვილმა დოკუმენტს ხელი არ მოაწერა:

"რომ არ მოგატყუოთ, გაუგებარია რატომ მაბარებენ იმიტომ, რომ იმ ვითომ ჩანაწერშიც კი, რომელიც გამოაქვეყნეს წერია ირმა ნადირაშვილი და 3 წერტილი. ამის გამო მე სუსში წინ და უკან უნდა ვირბინო, როდესაც არჩევნებამდე 12 დღეა დარჩენილი? მზად ვარ ვუპასუხო ნებისმიერ კითხვას, მობრძანდნენ ოფისში".

ფარულ აუდიო ჩანაწერში, რომელიც 27 სექტემბერს გამოქვეყნდა, ისმის მიხეილ სააკაშვილისა და ერთიანი ნაციონალური მოძრაობის ლიდერების ხმა, რომლებიც თითქოს საუბრობენ საქართველოში მოვლენების რევოლუციური სცენარით განვითარებაზე. ჩანაწერში ისმის საუბარი რუსთაველის გამზირის კარვებით გავსებაზე, ივანიშვილის სახლთან აქციებზე, ასევე, მის მიმართ ფიზიკურ ანგარიშსწორებაზე, თუმცა, თავად საუბრის მონაწილეები აცხადებენ, რომ ეს საუბარი რეალური არ არის და ის სახელმწიფო უსაფრთხოების სამსახურის მიერაა დამონტაჟებული.

აღნიშნულთან დაკავშირებით სახელმწიფო უსაფრთხოების სამსახურმა გამოძიება სისხლის სამართლის კოდექსის 315-ე მუხლის 1-ლი ნაწილით დაიწყო.