შსს-ს განცხადებით, აღმაშენებლის გამზირზე დღეს, 27 სექტემბერს სამართალდამცავებმა რამდენიმე პირი, ადმინისტრაციული სამართალდარღვევის მუხლით დააკავეს. უწყება დაკავების მიზეზებს ჯერჯერობით არ განმარტავს.

ტელეკომპანია რუსთავი 2-ის ინფორმაციით, შემთხვევა მაშინ მოხდა, როდესაც ორგანიზაცია ქართული ძალის წევრები გამზირზე აქციას მართავდნენ.

მათ თურქულ რესტორნებთან შეძახილებით "დიდება ერს, სიკვდილი მტერს" ჩაიარეს. რამდენიმე საათის წინ ორგანიზაციამ ანტითურქული, ქსენოფობიური განცხადება საკუთარი ფეისბუკის გვერდზეც გააკეთა:

"ქართველი ნაციონალისტების გაფრთხილება ბათუმის უკანონო თურქულ სასწავლებელს. საქართველო ქართველებისთვის და ქართველები საქართველოსთვის! უახლოეს მომავალში მთელი ქვეყნიდან ჩავალთ ბათუმში და სათანადო რეაქცია გვექნება ამ ფაქტთან დაკავშირებით."