ნენსკრას პროექტით სახელმწიფო წელიწადში მინიმუმ 60 მლნ აშშ დოლარით იზარალებს. ეს დასკვნა მწვანე ალტერნატივამ ნენსკა ჰესის მშენებლობაზე სახელმწიფოსა და პროექტის წარმომადგენლებს შორის გაფორმებული ხელშეკრულების ანალიზის საფუძველზე გამოაქვეყნა.

"სახელმწიფოს მიერ აღებული ვალდებულებების მიხედვით თუ ვიმსჯელებთ, გასაგებია, თუ რატომ იყო ეს დოკუმენტი გასაიდუმლოებული. ამ კაბალური პირობებით პროექტის განხორციელების შემთხვევაში სახელმწიფოს მიადგება ასობით მილიონი ლარის ზარალი ყოველწლიურად, კითხვის ნიშნის ქვეშ დადგება ელექტროენერგო უსაფრთხოება და გამოიწვევს ელექტროენერგიის ტარიფის მნიშვნელოვან ზრდას", — აღნიშნულია მწვანე ალტერნატივის განცხადებაში.

როგორც ორგანიზაცია წერს, ნენსკრა საქართველოს ზამთრის დეფიციტის მხოლოდ ნახევარზე ნაკლებს (43%-ს) შეავსებს. ის საქართველოს ზამთრის დეფიციტის შესავსებად მხოლოდ 21%-ს გაიღებს.

გამოქვეყნებული ანალიზის მიხედვით, ჰესის პროექტის დასაბუთებაში აღნიშნულია, რომ მისი ერთ-ერთი მთავარი მიზანი სახელმწიფოსთვის დენის არსებულ ფასებზე იაფად მიწოდებაა. მწვანე ალტერნატივა აღნიშნავს, რომ ჰესის მიერ გამომუშავებული ელექტროენერგია სინამდვილეში საქართველოში არსებული ელექტროენერგიის ფასებზე ორჯერ ძვირი იქნება (არსებული ფასი: 4,9 აშშ ცენტი. ნენსკრას ფასი: 13 წლის განმავლობაში საშუალოდ 10,6 აშშ ცენტი, მას შემდეგ — 12,7 აშშ ცენტი).

გამოაშკარავებული დოკუმენტის მიხედვით, სახელმწიფო ასევე ვალდებულებას იღებს, ნენსკრასგან 36 წლის განმავლობაში ელექტროენერგია ყოველთვის შეისყიდოს მაღალ ფასად — საშუალოდ 29,6 თეთრი, რომლის ნაწილსაც ის ექსპორტზე გაიტანს. ნენსკრასგან შესასყიდი ფასი კი დღევანდელ საექსპორტო ღირებულებას ბევრად აღემატება (9 თეთრი).

ამას გარდა, სახელმწიფო აზღვევს ჰესის ჰიდროლოგიურ რისკებს და ზიანს უნაზღაურებს. სახელმწიფო, ასევე, ვალდებულია, რომ ნენსკრა ჰესს ტერიტორიები ერთ დოლარად გადასცეს, რომელთა დიდი ნაწილი ჭუბერისა და ნაკრას თემების საგვარეულო ტყეებსა და სათემო საკუთრებას მოიცავს. ტერიტორიის 700 ჰექტარზე მეტი უკვე ნენსკრასთვის გადაცემულია.

ხელშეკრულება ნენსკრა ჰესის მშენებლობის შესახებ 2015 წლის 31 აგვისტოს გაფორმდა და 2019 წლის 8 ივნისს, რუსთავი 2-ის გადაცემა შაბათის კურიერში გასაჯაროვდა. 280 მგვტ სიმძლავრის ნენსკრა ჰესის საქართველოში მშენებარე ჰიდროელექტროსადგურებს შორის ყველაზე მასშტაბურია. ჰესის მშენებლობის წინააღმდეგ სვანეთის მოსახლეობის ნაწილმა სვანეთში და თბილისში არაერთი საპროტესტო აქცია გამართა.