ქუთაისის საკრებულოს ქართული ოცნების დეპუტატი, რომელიც ცდილობს დაამტკიცოს, რომ სალომე ბარკერს პოსტი ისე მიუძღვნა, რომ მისი დის გარდაცვალება არ იცოდა, ფეისბუქზე მაია ასათიანის შვილის გარდაცვალების მეორე დღესაც მსგავსი პათოსით წერდა.

2017 წლის 23 თებერვალს მაია ასათიანის შვილი გარდაიცვალა, გარდაცვალებიდან რამდენიმე საათში ნანა კოსტავა წერდა, რომ "ვინც ზნეობის სადარაჯოზე არ დგას, უფალი ყოველთვის მოუვლენს განსაცდელს გამოსაფხიზლებლად". ამ საკითხზე On.ge დეპუტატს დაუკავშირდა, თუმცა მან თქვა, რომ კომენტარის გაკეთება არ სურდა.

ქუთაისის საკრებულოში ქართული ოცნების დეპუტატმა ნანა კოსტავამ Facebook-ზე სოციალური მედიის მენეჯერის, სალომე ბარკერის ვიდეო გააზიარა წარწერით: "კაი დღეში ხარ ახლა, იცინე!" საკრებულოს წევრის მიერ ვიდეოს ამ აღწერით გაზიარება დროში ბარკერის დის გარდაცვალებას დაემთხვა.

მოგვიანებით კოსტავამ ბოდიში მოიხადა. მან ისევ გაიმეორა, რომ სალომე ბარკერის დის გარდაცვალების შესახებ არაფერი იცოდა. თუმცა On.ge-სთან საუბრისას ბარკერზე მან აღნიშნა, რომ "რაღაცნაირად ბოროტი ძალებისგან გადაუხადეს სამაგიერო".