სოციალურ ქსელში ქართული ოცნების მთაწმინდის მაჟორიტარი დეპუტატობის კანდიდატის, ლადო კახაძის მხარდამჭერი სარეკლამო კლიპი გამოჩნდა. კლიპში ცნობილი ადამიანები ლადო კახაძეზე საუბრობენ და პოზიტიურად დასახასიათებლად სხვადასხვა ფრაზებს იყენებენ.

"თუკი ვინმეს ვიცნობ, ყველაზე ქართული, ყველაზე ვაჟკაცური, ყველაზე პატიოსანი ხასიათით, ასეთი არის ლადო კახაძე", — ამბობს ვიდეოს დასაწყისში ქართული ოცნების თავმჯდომარე, მამუკა მდინარაძე.

მდინარაძის შემდეგ კლიპში კომპოზიტორი, მარიკა კვალიაშვილი ჩანს, რომელიც ამბობს, რომ კახაძე სიწმინდის, სისუფთავის, პატიოსნებისა და წესიერების სიმბოლოა. სარეკლამო ვიდეოში ასევე ჩანან მომღერალი ზურა ხაჩიძე, მსახიობი კახი კავსაძე, მსახიობი ნანული სარაჯიშვილი, კომპოზიტორი მერაბ სეფიაშვილი და სხვები.

ვიდეოში ისინი ამბობენ, რომ ლადო კახაძე ყველა პაციენტს ეფერება, არის კარგი ბაბუა, კაცი, რომელსაც შეგიძლია ენდო და მთელი ქალაქისთვის საყვარელი ადამიანი.

მთაწმინდაზე შუალედური არჩევნების მეორე ტური ცხრა ივნისს გაიმართება. პარლამენტის დეპუტატობისთვის ლადო კახაძის კონკურენტი თავისუფალი დემოკრატებისა და ევროპული საქართველოს ბლოკის კანდიდატი, შალვა შავგულიძე იქნება.