რუსთავი #6 დაწესებულების მსჯავრდებულმა, ავთანდილ სოფრომაძემ სხვა დაწესებულებაში გადაყვანის მოთხოვნით მაკრატლით მუცლის არეში თვითდაზიანება მიიყენა. პენიტენციური სამსახურის ცნობით, შემთხვევა 5 მაისს მოხდა.

დღეს, 27 მაისს სპეციალური პენიტენციური სამსახურის შენობასთან მსჯავრდებულის დედის, ახლობლებისა და უფლებამცველის აქცია გაიმართა. ისინი აცხადებენ, რომ პატიმარზე ციხის ადმინისტრაცია ახდენს ზეწოლას. დედის თქმით, მის შვილს დარეკვის უფლება აუკრძალეს და არც თავად აქვს მისი ნახვის შესაძლებლობა:

"ვითხოვ, გადამირჩეს შვილი. რუსთავის მეექვსეში რომ დარჩეს ჩემი შვილი, მე იმას მკვდარს წამოვიღებ იქიდან".

პენიტენციურ სამსახურში On.ge-ს განუცხადეს, რომ ავთანდილ სოფრომაძე ცრუობს, როდესაც ამბობს, რომ ციხის ადმინისტრაცია მასზე ზეწოლას ახდენს. უწყებაში მის ქმედებას "პროვოკაციად" აფასებენ:

"მსჯავრდებული ცრუ ინფორმაციების გავრცელებით ცდილობს ციხის ადმინისტრაციის დაშანტაჟებას და მისთვის სასურველი შედეგის მიღწევას — სასჯელის მოხდის ადგილის შეცვლას".

პენიტენციურ სამსახურში აცხადებენ, რომ პატიმარი უარს აცხადებს სამედიცინო დახმარებაზე.

"ავთანდილ სოფრომაძემ დაზიანება მიიყენა ფრჩხილების საჭრელი პატარა მაკრატლით, რომლის წვერი კანქვეშ აქვს დაფიქსირებული (ხელით) და უარს აცხადებს ლითონის საგნის ამოღებაზე. მსჯავრდებული იმყოფება ექიმების მუდმივი მეთვალყურეობის ქვეშ".

უწყების მტკიცებით, პატიმრის ჯანმრთელობის მდგომარეობა სტაბილურია:

"აღენიშნება მცირედი ჰიპერემია, ინტოქსიკაციის ნიშნების გარეშე".

On.ge დაუკავშირდა სახალხო დამცველს, იცნობს თუ არა მსჯავრდებულის უფლებრივ მდგომარეობას. ომბუდსმენის ოფისში აცხადებენ, რომ პატიმარი ჯერ არ უნახავთ და მასთან მისვლა მიმდინარე კვირაში იგეგმება.