მთაწმინდის მაჟორიტარობის კანდიდატები ლადო კახაძე და შალვა შავგულიძე საზოგადოებრივი მაუწყებლის მიერ შეთავაზებულ დებატებს დათანხმდნენ. თუმცა, ევროპული საქართველოს კანდიდატი შავგულიძე ამბობს, რომ დებატები სხვა ტელევიზიებშიც უნდა გაიმართოს.

შავგულიძის თქმით, მან აქამდე მიიღო შეთავაზება ტელეკომპანია პირველისგან და იმასაც დათანხმდა. მისივე თქმით, თუ ტელეკომპანია რუსთავი 2 და იმედი შესთავაზებენ დებატებს, იქაც მივა.

მმართველი პარტიის კანდიდატი ლადო კახაძე აცხადებს, რომ მზად არის რთული კითხვებისა და ოპონირებისთვის. მისი თქმით, დებატები კიდევ ერთი საშუალებაა პარტიის მხარდამჭერებს და იმ ადამიანებს, ვისაც ჯერაც ვერ გადაუწყვეტიათ, ვის დაუჭირონ მხარი საკუთარ გეგმებზე ესაუბროს.

მთაწმინდაზე პარლამენტის შუალედური არჩევნების მეორე ტური, სავარაუდოდ, 9 ივნისს გაიმართება. ცეკოს განცხადებით, ოფიციალურ თარიღს პირველი ტურის შედეგების დათვლის შემდეგ დაასახელებენ.