საქართველოს თავდაცვის მინისტრი, ლევან იზორია ამბობს, რომ პერსპექტივაში, ამერიკული სამხედრო ბაზების საქართველოში არსებობას მიესალმება. ამის შესახებ მან ამერიკის ხმის ქართულ რედაქციას განუცხადა.

"ჩვენ გვაქვს უპრეცედენტო თანამშრომლობა სამხედრო სფეროში განსაკუთრებით აშშ-სთან. ეს არ არის მხოლოდ ჩვენს მიერ გაცხადებული, ეს არის ასევე ჩვენი მთავარი სტრატეგიული პარტნიორებისგან გაცხადებული, რომ არასდროს ასეთი მჭიდრო, ასეთი ყოვლისმომცველი ეს ურთიერთობა არ ყოფილა. ეს გვაძლევს საფუძველს, რომ მომავალში ეს თანამშროლობა გაფართოვდეს", — თქვა იზორიამ.

საქართველოს პრეზიდენტმა, სალომე ზურაბიშვილმა ამერიკის ხმასთან ინტერვიუში თქვა, რომ საქართველოში ამერიკული სამხედრო ბაზის აშენება, შესაძლოა, პროვოკაციად იქნას აღქმული. ზურაბიშვილმა განაცხადა, რომ მას "არ ჰგონია", საქართველოში ამერიკული ბაზის აშენება რეკომენდირებული იყოს.