თბილისის საქალაქო სასამართლომ ხორავას ქუჩის საქმეზე ცრუ ჩვენებისთვის ბრალდებული არასრულწლოვანი, დ.ღ. დამნაშავედ სცნეს. განაჩენი რამდენიმე წუთის წინ გახდა ცნობილი.

საქმის პროკურორმა ტელეკომპანია მაესტროს განუცხადა, რომ არასრულწლოვნის წინააღმდეგ მტკიცებულებების სახით არსებობდა ათეულობით მოწმის ჩვენება, წარმოდგენილი იყო ვიდეოჩანაწერები და წერილობითი მტკიცებულებები. რაც შეეხება სასჯელს, პროკურორის თქმით, სასამართლო სასჯელის სახესა და ზომას 22 მაისს გამოაცხადებს.

ცრუ ჩვენების ბრალდებით დ.ღ. 19 ივლისს დააკავეს. მას აღკვეთი ღონისძიების სახით პატიმრობა შეუფარდეს, ხოლო ექვსი თვის შემდეგ პატიმრობა გირაოთი შეეცვალა.

ხორავას ქუჩის საქმე

2017 წლის დეკემბერში ხორავას ქუჩაზე პირველი ექსპერიმენტული სკოლისა და 51-ე სკოლის მოსწავლეებს შორის დაპირისპირების შედეგად დავით სარალიძე და ლევან დადუნაშვილი დაიღუპნენ. ერთი მოზარდი საავადმყოფოში მიყვანამდე გარდაიცვალა, მეორე კი, რამდენიმე ოპერაციის მიუხედავად, 2 დეკემბერს საავადმყოფოში დაიღუპა. საქმეზე ორი არასრულწლოვანი გ.ბ. და გ.ჯ. დააკავეს.

31 მაისის სასამართლოს გამამტყუნებელი განაჩენით, გ.ბ. დამნაშავედ სცნეს დამამძიმებელ გარემოებაში წინასწარი შეცნობით არასრუწლოვან ლევან დადუნაშვილის განზრახ მკვლელობაში, ხოლო, გ.ჯ. დამნაშავედ სცნეს დამამძიმებელ გარემოებაში წინასწარი შეცნობით არასრუწლოვან დავით სარალიძის განზრახ მკვლელობის მცდელობაში.

ამავე განაჩენით, გ.ბ. , გ.ჯ.-სთან ერთად უდანაშაულოდ იქნა ცნობილი დავით სარალიძის ჯგუფურ მკვლელობაში, ხოლო გ.ჯ. მიერ ჩადენილი დანაშაული სასამართლოს მიერ დაკვალიფიცირდა, როგორც დავით სარალიძის მკველობის მცდელობა დამაძიმებელ გარემოებაში.

სასამართლოს განაჩენის მიხედვით, დავით სარალიძის მკვლელი უცნობია. ამას დაღუპულის მამის, ზაზა სარალიძის მხრიდან პროტესტი მოჰყვა. მან ქუჩის გამოსვლების ორგანიზება დაიწყო.

გარდა ამისა, დანაშაულის შეუტყობინებლობისთვის სასამართლომ დამნაშავედ სცნო პროკურატურის ყოფილი მაღალჩინოსანი მირზა სუბელიანი. მას თავისუფლების აღკვეთა ერთი წლითა და ერთი თვით მიუსაჯეს.

ამავე თემაზე: