საქართველოს უზენაესი სასამართლოს ყოფილი თავმჯდომარე და იუსტიციის უმაღლესი საბჭოს ყოფილი თავმჯდომარე, ნინო გვენეტაძე ამტკიცებს, რომ თანამდებობა ზეწოლის გამო არ დაუტოვებია. მან დღეს, 10 აპრილს კიდევ ერთხელ აღნიშნა, რომ ჯანმრთელობის პრობლემები ჰქონდა.

"არავითარი ზეწოლა ჩემზე არ განხორციელებულა. მე მყარი საკონსტიტუციო ვადით ვიყავი გამწესებული უზენაეს სასამართლოში და არავითარი ზეწოლა არ ყოფილა", - აღნიშნა მან.

ჟურნალისტებმა მას მისი ყოფილი თანაშემწის კომენტარი შეახსენეს, რომელიც მის მიმართ ზეწოლაზე საუბრობდა, რასაც უზენაესი სასამართლოს ყოფილმა თავმჯდომარემ ასე უპასუხა:

"მე ვიცნობ ჩემი ყოფილი თანაშემწის განცხადებებს, მას აქვს მოსაზრებები, რომლებიც გარკვეულ საკითხთან მიმართებაში აზრთა სხვადასხვაობისას, ბუნებრივია, იწვევდა განსხვავებულ და ხშირად კონფლიქტურ სიტუაციებს".

ნინო გვენეტაძემ უზენაესი სასამართლოს თავმჯდომარის თანამდებობა 2018 წლის 2 აგვისტოს დატოვა. მანამდე ის ამბობდა, რომ მუქარის მსხვერპლი იყო, თუმცა ახლაც და წასვლის შესახებ განცხადებაშიც ჯანმრთელობის პრობლემაზე გაამახვილა ყურადღება.