ევროპული საქართველოს დეპუტატმა გიგა ბოკერიამ დღეს, პარლამენტის 2 აპრილის სხდომაზე შს მინისტრს გიორგი გახარიას ვიდეო კოლაჟი აჩვენა, სადაც, მისივე თქმით, პოლიციაზე ძალადობის ფაქტებია აღბეჭდილი. გიგა ბოკერიას თქმით, ვიდეოკოლაჟში ასახულია ბოლო წლების ფაქტები, სადაც ქართული ოცნების მხარდამჭერები ფიზიკურად უსწორდებიან სამართალდამცავებს.

დეპუტატმა ჰკითხა, თუ რამდენი ადამიანი დაისაჯა და რამდენი იხდის სასჯელს მათგან და ეს ფაქტი, რომ არ ისჯებიან, უწყობს თუ არა ხელს პოლიციის დისკრედიტაციას? ბოკერის თქმით, ნაციონალური მოძრაობის წევრი, დავით კირკიტაძე იმავე ბრალდებით იხდის დღეს სასჯელს.

"ამ ინციდენტებისთვის კი, სადაც პოლიციელებს როგორ ურტყამენ თქვენს პოლიტიკურ ძალასთან დაკავშირებული პირები, ამისთვის ისინი არ ისჯებიან. რა გზავნილია ეს კანონის უზენაესობისთვის?" — ჰკითხა გიგა ბოკერიამ გიორგი გახარიას.