ფეისბუქის მომხმარებელი ქალი საჯარო პოსტს აქვეყნებს და წერს, რომ მასზე ორმა კაცმა და ერთმა ქალმა ფიზიკურად იძალადა. ქალის თქმით, ძალადობის მსხვერპლი მას შემდეგ გახდა, რაც თქვა, რომ მისი მცირეწლოვანი შვილი ყოფილი ქმრის სახლში სცემეს. შემთხვევა ვანში მოხდა.

ის წერს, რომ ქმარს ძალადობის გამო რამდენიმე წლის წინ დაშორდა. მისი განცხადებით, ყოფილი მეუღლე ძალადობდა არა მხოლოდ მასზე, არამედ მის მამაზეც.

"ამას იმიტო ვწერ რომ ისეთი ნაცემი ვარ რო მგონი ხვალამდე ვერ მივაღწიო და თუ ჩავაკვდი დღეს ესე აკანკალებული და ცოცხალ-მკვდარი დღეს დედაჩემს ხელებში იცოდეთ ვისი ბრალია", — წერს ქალი.

On.ge-ს შინაგან საქმეთა სამინისტროში განუცხადეს, რომ გვიან ღამით, პოსტის დაწერიდან რამდენიმე წუთში მოახდინეს რეაგირება და გამოძიება ოჯახში ძალადობის მუხლით დაიწყეს.

"დაინიშნება სამედიცინო ექსპერტიზა და გაირკვევა დაზიანების ხარისხი" — აცხადებენ შსს-ში. უწყების განმარტებით, კაცები, რომელსაც თეკო მიქაძე ძალადობაში ადანაშაულებს, მისი ნათესავები არიან.

ამ ეტაპზე უცნობია, იყო თუ არა გამოწერილი წარსულში შემაკავებელი ან დამცავი ორდენი ქალის ქმრის ან ნათესავების წინააღმდეგ. დეტალებს დაზუსტების შემთხვევაში მოგაწვდით.