შინაგან საქმეთა მინისტრის მოადგილემ, ნათია მეზვრიშვილმა მედიასთან საუბრისას ლევან ჯიბღაშვილისთვის აღკვეთის ღონისძიებად გირაოს შეფარდების სამართლებრივი საფუძვლები განმარტა. მან თქვა, რომ შინაგან საქმეთა სამინისტროსთვის ჯიბღაშვილი არის ჩვეულებრივი ბრალდებული.

"პროკურატურამ მას წაუყენა ბრალი, შემდეგ მოითხოვა აღკვეთის ღონისძიება, რომელიც რატომღაც, სამწუხაროდ, საზოგადოებას ხშირად ერევა სასჯელში. აღკვეთის ღონისძიება გამოიყენება პირის მიმართ ინდივიდუალურად, პიროვნული მახასიათებლების, წარსული ნასამართლეობის და ა.შ გათვალისწინებით. შესაბამისად, ამით ყველაფერი დამთავრებული არ არის. ეს ნიშნავს იმას, რომ ხვალ სასამართლომ შეიძლება ბატონ ჯიბღაშვილს სასჯელის სახით თავისუფლების აღკვეთა შეუფარდოს", — განმარტა ნათია მეზვრიშვილმა.

მან აღნიშნა, რომ ვერ ხვდება რას მოჰყვა საზოგადოების პროტესტი, რადგან 260-ე მუხლის იმ ნაწილზე რითაც ლევან ჯიბღაშვილს აქვს ბრალი წარდგენილი "საკმაოდ ბევრ ბრალდებულს ნახავთ გარეთ გირაო შეფარდებულს."

"ჩემთვის უბრალოდ ცოტა გაურკვეველია, ალბათ ბატონი ჯიბღაშვილი ამ წუთას პატიმარი რომ ყოფილიყო სხვანაირ კონტექსტში დაისმებოდა შეკითხვები, რამდენად მძიმეა კანონმდებლობა, ნარკოპოლიტიკა და როგორ უნდა შევცვალოთ ეს ნარკოპოლიტიკა. ჩვენთვის ბატონი ჯიბღაშვილი არის ჩვეულებრივი ბრალდებული, არ შეძლება ყველაფერში შეთქმულების თეორიები ვეძებოთ", — აღნიშნა ნათია მეზვრიშვილმა.

აღკვეთ ღონისძიებად გირაოს გამოყენებასთან დაკავშირებით განცხადება პროკურატურამაც გაავრცელა. უწყებამ განაცხადა, რომ როდესაც პირს წარდგენილი აქვს ბრალდება საქართველოს სისხლის სამართლის კოდექსის 260 მუხლის 1, 2 ან 3 ნაწილით, არ არის ნასამართლევი, აღიარებს ჩადენილ დანაშაულს და არ იკვეთება ნარკოტიკული საშუალების გასაღება პროკურატურა აღკვეთის ღონისძიებად გირაოს შუამდგომლობას აყენებს.

მსახიობ ლევან ჯიბღაშვილს გუშინ სასამართლომ გირაოს სახით 10 000 ლარი შეუფარდა. მას ბრალი სისხლის სამართლის კოდექსის 260-ე მუხლის პირველი ნაწილით წარედგინა, რაც ნარკოტიკული საშუალების უკანონო შეძენა-შენახვას გულისხმობს. შინაგან საქმეთა სამინისტროში On.ge-ს უთხრეს, რომ მანქანიდან 0,5659 გრამი კოკაინი და 0,1921 გრამი ექსტაზი (MDMA) ამოიღეს.