მოძრაობა პაატა ბურჭულაძე - სახელმწიფო ხალხისთვის წარმომადგენელი, ვახტანგ მეგრელიშვილი On.ge-სთან საუბარში განმარტავს, რომ საარჩევნო სუბიექტი, გამარჯვების შემთხვევაში, ყველა სკოლის მოსწავლის მშობელს 1200 ლარით დააფინანსებს:

"თუმცა ის მშობლები, რომლებიც თავიანთ შვილებზე გარკვეული მიზეზების გამო არ ზრუნავენ, არა ფულად დახმარებას, არამედ ვაუჩერებს მიიღებენ".

მეგრელიშვილი ამბობს, რომ სკოლებს სრული ავტონომია მიენიჭებათ და თავად გადაწყვეტენ, როგორი მასწავლებელი დაიქირავონ, მათი ხელფასები კი შეთანხმების საგანი იქნება:

"იმ 1 200-ლარიანი დაფინანსებით, თუ სკოლა ამას ეფექტიანად გამოიყენებს, დღევანდელი მასწავლებლების ხელფასები დაახლოებით 2,5-ჯერ გაიზრდება. თუმცა, სახელმწიფო ვერავის დაჰპირდება, რომ რომელიმე მასწავლებელს სამსახურიდან არ გაუშვებენ ან პირიქით, რომელიმეს ხელფასს 5-ჯერ არ გაუზრდიან".

მან ასევე აგვიხსნა, რომ ამოქმედდება სისტემა, რომლის თანახმადაც, მოსწავლეთა ის უნარ-ჩვევები განისაზღვრება, რომელსაც ბავშვი თავისი ასაკის შესაბამისად უნდა ფლობდეს:

“ამ შემთხვევაში მშობელი დაფინანსებას მაინც მიიღებს, მაგრამ თუ სახელმწიფო ხედავს, რომ ბავშვი იმ ასაკობრივი ჯგუფისთვის დამახასიათებელ მინიმალურ უნარ-ჩვევებს ვერ ფლობს, ეს ფულადი დაფინანსება გარდაიქმნება ვაუჩერულ დაფინანსებად და მშობელი იძულებული იქნება ისეთ საგანმანათლებლო დაწესებულებაში მიიყვანოს ბავშვი, სადაც ეს ვაუჩერი მიიღება. ჩვენ ვუშვებთ თავისუფლად, რომ სკოლები სხვადასხვა ფორმატის იყოს, მათ შორის განსხვავება იყოს სწავლების მეთოდებში და ა.შ.”.

ვრცლად პოლიტიკური სუბიექტების საარჩევნო პროგრამების შესახებ ინფორმაცია შეგიძლიათ იხილოთ აქ:

პარტიების დაპირებები და ხედვა განათლების სისტემის შესაცვლელად