ეკონომიკის მინისტრად ნათია თურნავა დაინიშნა. შესაბამისი ბრძანება მთავრობის ვებგვერდზე გამოქვეყნდა და მას პრემიერ-მინისტრი აწერს ხელს. ნათია თურნავა ყოფილი მინისტრის, გიორგი ქობულიას მოადგილე იყო.

როგორც მთავრობის ადმინისტრაციის ხელმძღვანელმა, კახა კახიშვილმა განაცხადა, გადაწყვეტილება მინისტრის შეცვლასთან დაკავშირებით პრემიერ-მინისტრმა კონსულტაციების შემდეგ მიიღო:

"გადაწყვეტილების მიღება მოხდა კონსულტაციის შედეგად, როგორც ბატონ გიორგი ქობულიასთან, ისე, რა თქმა უნდა, დანიშვნის დროს ქალბატონ ნათია თურნავასთან, ამავდროულად უმრავლესობის ლიდერებთან".

ეკონომიკის ყოფილი მინისტრის, გიორგი ქობულიას გადადგომის შესახებ ინფორმაცია დღეს, 18 აპრილს გავრცელდა. პრემიერ-მინისტრმა, მამუკა ბახტაძემ კი ქობულიას გათავისუფლების შესახებ ბრძანებას დღესვე მოაწერა ხელი.

ვინ არის ნათია თურნავა

ნათია თურნავა ეკონომიკის მინისტრის მოადგილედ 2018 წლის სექტემბერში დაინიშნა. მანამდე კი ის საპარტნიორო ფონდის აღმასრულებელი დირექტორის მოადგილედ მუშაობდა.

2006-2013 წლებში ნათია თურნავა საქართველოს ინდუსტრიული ჯგუფის დირექტორთა საბჭოს წევრი, საქართველოს საერთაშორისო ენერგეტიკული კორპორაციის გენერალური დირექტორი და დირექტორთა საბჭოს თავმჯდომარე იყო.

ეკონომიკის მინისტრის პირველ მოადგილედ ნათია თურნავა მუშაობდა 2000-2005 და 2005-2006 წლებში. გარდა ამისა, 2005 წელს ის საქართველოს პრეზიდენტთან არსებული უშიშროების საბჭოს მდივნის მოადგილე იყო.

მანამდე, 1998-2000 კი თურნავა თბილისის საკრებულოს წევრი და საკრებულოს საფინანსო-საბიუჯეტო კომისიის თავმჯდომარის მოადგილე იყო.

განათლებით ნათია თურნავა ეკონომისტია და ბაკალავრი თბილისის სახელმწიფო უნივერსიტეტში დაამთავრა. ამავე უნივერსიტეტში გაიარა ასპირანტურა. სამაგისტრო პროგრამა დიდი ბრიტანეთის კუმბრიის საგრაფოს უნივერსიტეტში დაასრულა და ბიზნეს ადმინისტრირების სამაგისტრო ხარისხი მიენიჭა. არის 40-მდე სამეცნიერო ნაშრომის, სტატიის და მონოგრაფიის ავტორი, ორი წიგნის თანაავტორი.