ბიზნესომბუდსმენმა, ირაკლი ლექვინაძემ დღეს, 15 აპრილს აპარატის საქმიანობის სტატისტიკა წარადგინა და მიმართვიანობის ანალიზის მიხედვით ბიზნესის ინტერესების დაცვის მიმართულებით გამოკვეთილ კრიტიკულ საკითხებზე ისაუბრა. მისი განცხადებით, ერთ-ერთი ასეთი საკითხია საბანკო რეგულაციების ბიზნეს სექტორზე გავლენა. ბიზნესომბუდსმენს მიაჩნია, რომ მნიშვნელოვანია რეგულაციების შერბილება იმისთვის, რომ ბიზნესაქტივობაზე "დრამატული გავლენა არ მოახდინოს".

მისი თქმით, კრიტიკულ საკითხებს შორისაა თბილისის ახალი გენერალური გეგმით განსაზღვრული ზონირების ფარგლებში მიწის მესაკუთრეების უფლებების შეზღუდვის შემთხვევებიც.

"მიგვაჩნია, რომ ქალაქ თბილისის მუნიციპალიტეტის მერიის მიერ მიწის მესაკუთრეებისათვის განხილული და შეთავაზებული უნდა იქნას პრობლემის გადაჭრის სხვადასხვა ალტერნატივა, მათ შორის მიწის ნაკვეთების მონაცვლეობის გამოყენებით, რათა არ შეილახოს მათი სამეწარმეო ინტერესები და შეუფერხებლად მოახერხონ ბიზნეს საქმიანობის გაგრძელება", — ამბობს ირაკლი ლექვინაძე.

მისივე თქმით, პრობლემად რჩება ადმინისტრაციული ორგანოების მხრიდან პასუხგაუცემელი და დაგვიანებული პასუხები სხვადასხვა მიმდინარე საკითხებზე.