აჭარის საზოგადოებრივი მაუწყებლის სამეურვეო საბჭომ დღეს უნდა იმსჯელოს იმ განცხადებაზე, რომლითაც ამავე საბჭოს ორმა წევრმა, ირაკლი დარცმელიძემ და გიგა ჩხარტიშვილმა ტელევიზიის დირექტორის ნათია კაპანაძის იმპიჩმენტი მოითხოვა. ტელევიზიის შესახებ პოზიტიური საერთაშორისო შეფასებების ფონზე, არასამთავრობო ორგანიზაციები კაპანაძის გადაყენების მოთხოვნას ნეგატიურად აფასებენ. ოპოზიციური პარტიები ცალსახად მიანიშნებენ მიმდინარე პროცესში ხელისუფლების ინტერესებზე. ქართულ ოცნებაში კი ამბობენ, რომ აჭარის ტელევიზიასთან დაკავშირებულ საკითხზე ინფორმაცია არ აქვთ და შესაბამისად, ვერაფერს იტყვიან.

ქართული ოცნება

ქართული ოცნების დეპუტატი გია ვოლსკი ამბობს, რომ არ იცნობს არც ტელევიზიის და არც სამეურვეო საბჭოს პოზიციას, თუმცა აჭარის მაუწყებელი მოსწონს.

ფოტო: გვანცა ნემსაძე / On.ge

"ჟურნალისტების საკმაოდ კვალიფიცირებული ჰყავთ, რომელსაც ჩვენთან აგზავნიან. თემას არ ვიცნობ, თუ რატომ ითხოვენ გადადგომას, რომც ვიცნობდე შეფასებას ვერ გავაკეთებ, იმიტომ, რომ საბჭოს დამოუკიდებლობის საკმაოდ მაღალი ხარისხი აქვს", — განაცხადა გია ვოლსკიმ.

ქართული ოცნების დეპუტატის გიორგი გაჩეჩილაძის თქმით, აჭარის ტელევიზია გამოირჩევა საქართველოს მედიასივრცეში, როგორ მიუკერძოებელი და დამოუკიდებელი არხი.

"ეს ფაქტი ძალიან საინტერესოა. თან საზოგადოებრივი მაუწყებელია. ბიუჯეტიდან ფინანსდება და ეს არის მიღწევა, ყოველგვარი არეულობა და წინააღმდეგობის შეტანა ამ პროცესში არ გამოადგება თვითონ ტელევიზიისა და მედიის თავისუფლებას", — განაცხადა გია გაჩეჩილაძემ.

ის ფიქრობს, რომ მმართველი გუნდის ინტერესი არაა 2012 წლის შემდეგ შექმნილი დემოკრატიული იმიჯის შელახვა.

"ბუნებრივია, მმართველი გუნდი ყოველთვის ცდილობს ნაკლებად ჩაერიოს ტელევიზიის ბადეში და ეს სტრატეგიული ამოცანაა",— განაცხადა გია გაჩეჩილაძემ.

ფოტო: სალომე ჩადუნელი / On.ge

აჭარის ტელევიზიის დირექტორის იმპიჩმენტზე ინფორმაციას არ ფლობს, ქართული ოცნების წევრი დავით მათიკაშვილი. მისი თქმით, "თავისუფალი მედიის მხარდამჭერია, თუმცა კომენტარს ვერ გააკეთებს".

იგივე პოზიცია აქვს ქართული ოცნების კიდევ ერთ დეპუტატს ნინო გოგუაძეს. ის ამბობს, რომ საქართველოში დაბრუნებისთანავე შეისწავლის საკითხს და თავის პოზიციასაც დააფიქსირებს.

ევროპული საქართველო

ევროპული საქართველოს დეპუტატი ოთარ კახიძე აცხადებს, რომ ნათია კაპანაძის გადადგომა ხელისუფლების ინტერესია, რადგან აჭარის ტელევიზია დღეს ობიექტური და მიუკერძოებელია.

ფოტო: საქართველოს პარლამენტი

"აჭარის ტელევიზია არის ის ძალიან იშვიათი მაგალითი, როცა საზოგადოებრივი მაუწყებელი, მართლაც, არის საზოგადოების ინტერესებში და არა მთავრობისა და კონკრეტული პარტიის ინტერესებში. როგორც ჩანს ივანიშვილის ხელისუფლებისთვის ასეთი მოდელი არის მიუღებელი. როგორც ჩანს, თავის დროზე ქალბატონი ნათიას იქ დანიშვნა შეეშალათ, გამოეპარათ და ახლა სურთ, რომ პროპაგანდის სამსახურში ჩააყენონ ეს ტელევიზიაც", — განაცხადა კახიძემ.

ნაციონალური მოძრაობა

გაერთიანებული ოპოზიციის აჭარის ადგილობრივ წარმომადგენლობას მიაჩნია, რომ საზოგადოებრივი მაუწყებლის აჭარის ტელევიზიის დირექტორის იმპიჩმენტი ბორდის წევრებს ხელისუფლებამ დაავალა. განცხადება On.ge-ს ნაციონალური მოძრაობის პრესსამსახურმა მიაწოდა.

ნათია კაპანაძის მაუწყებლის დირექტორის თანამდებობაზე მუშაობის პოზიტიურად შესაფასებლად პარტიამ ეუთოს/OSCE-ს დასკვნაც გაიხსენა.

"როგორც ჩანს ხელისუფლებას არ აწყობს დაბალანსებული ტელევიზია და გადაწყვიტა ტელევიზიის საქმიანობაში ჩარევა, ამ გეგმის ნაწილია ტელევიზიის დირექტორის გადაყენება",— აღნიშნავენ გაერთიანებული ოპოზიციის წარმომადგენელები.

არასაპარლამენტო ოპოზიცია

ნათია კაპანაძეს მხარდაჭერა გამოუცხადა თავისუფალი დემოკრატების წევრმა ნინო გოგუაძემ. მისი თქმით, პოლიტიკოსებს არ მოსწონთ, როცა ტელევიზიაში მათი ინტერესების გატარება არ ხდება.

ფოტო: თორნიკე მანდარია/On.ge

"მე შემიძლია შევაფასო აჭარის ტელევიზია, როგორც თავისუფალი სივრცე, საზოგადოებრივი მაუწყებლისგან განსხვავებული და დამოუკიდებელი. სამწუხაროა, რომ პოლიტიკოსებს არ მოსწონთ, როცა მათი ინტერესების გატანა არ ხდება ამა თუ იმ არხსა და ეთერში. ასე რომ, მე დარწმუნებული ვარ, აქ არის პოლიტიკური ინტერესები და დარწმუნებული ვარ, რომ სიტყვის თავისუფლებას საფრთხე ემუქრება", — განაცხადა გოგუაძემ.

10 აპრილს საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოს ორმა წევრმა, ირაკლი დარცმელიძემ (ნაციონალური მოძრაობის კვოტით) და გიგა ჩხარტიშვილმა (ქართული ოცნების კვოტით) ტელევიზიის დირექტორის, ნათია კაპანაძის იმპიჩმენტი მოითხოვა. საბჭოს თავმჯდომარის, ნატა იმედაიშვილის განცხადებით, საბჭოს წევრების საჩივარი რამდენიმე საკითხს ეხება, მათ შორის პროგრამულ პრიორიტეტებს, ფონდების მიერ დაფინანსებულ გადაცემებს, ხელფასებს და ა.შ. ნათია კაპანაძეს იმ შემთხვევაში გადააყენებენ, თუ იმპიჩმენტს მხარს ბორდის სამი წევრი დაუჭერს.

ნათია კაპანაძის დირექტორობა

ნათია კაპანაძე აჭარის ტელევიზიის დირექტორად 2016 წლის 24 ოქტომბერს სამწლიანი ვადით აირჩიეს. უფლებამოსილების შესრულებას ის ამავე წლის 21 დეკემბრიდან შეუდგა.

მისი დირექტორობის პერიოდში ეთერში რამდენიმე სხვადასხვა გადაცემა გავიდა. მათ შორის, რადიო თავისუფლების პროექტები, რომელთა გაშვებაზეც საზოგადოებრივი მაუწყებლის პირველმა არხმა უარი განაცხადა.

წელს ეუთოს დემოკრატიული ინსტიტუტებისა და ადამიანის უფლებების ოფისმა (OSCE/ODIHR) ანგარიშში განაცხადა, რომ აჭარის ტელევიზია იყო "ერთადერთი ტელესადგური, რომელმაც შესთავაზა მაყურებელს არჩევნებში მონაწილეთა ზოგადი შედარება".

2018 წელს კაპანაძემ, დირექტორის რანგში ტოლერანტობის ქომაგის წოდება მიიღო.

გაიგე მეტი: