2 კვირაზე მეტი გავიდა მას შემდეგ, რაც საზოგადოებისთვის ცნობილი გახდა, რომ პოლიტიკოსს პირადი ცხოვრების კადრები კიდევ ერთხელ გაუვრცელეს. Youtube-ზე ვიდეოს ეწერა, რომ 2 კვირის წინ იყო ატვირთული და თითქმით 5 000 ნახვა ჰქონდა. ამ დრომდე ვიდეოს გაგზავნის ან ნახვის ბრალდებით შინაგან საქმეთა სამინისტროს არავინ დაუკავებია.

ამ პოლიტიკოსის პირადი ცხოვრების კადრები სოციალურ ქსელებში არაერთხელ გავრცელდა, მათ შორის, 28 და 31 იანვარს. პირველ იანვარს შინაგან საქმეთა სამინისტრომ აღნიშნული ვიდეოს ნახვის, მესენჯერში გაგაზავნისა და სხვა ფორმით გავრცელების ბრალდებით 16 ადამიანი დააკავა.

დაკავებულთაგან ერთ-ერთმა საკონსტიტუციო სასამართლოში სარჩელი შეიტანა და იმ მუხლის გაუქმებას ითხოვს, რომლითაც მას პატიმრობა ემუქრება. ერთი დაკავებული კი აცხადებს, რომ მას ვიდეო არ უნახავს და მესენჯერში დარჩენილი ლინკის გამო პატიმრობა უსამართლოდ ემუქრება.

კადრების გავრცელების შესახებ ბოლოს 26 მარტს გახდა ცნობილი. მაშინ პოლიტიკოსმა განაცხადა, რომ ვიდეოს შესახებ უწყება ინფორმირებული არ იყო და მათ თავად აცნობა. მეორე დღეს, 27 მარტს შსს-მ ვიდეოს Youtube-ზე ატვირთვის ბრალდებით ერთი პირი დააკავა.

უწყებაში On.ge-ს განუმარტეს, რომ პოლიტიკოსის პირადი ცხოვრების კადრების გავრცელების საქმეზე მიმდინარეობს საერთო გამოძიება სისხლის სამართლის კოდექსის 1571 მუხლის პირველი და მეორე ნაწილებით. მუხლი პირადი ცხოვრების საიდუმლოს უკანონოდ მოპოვებას, შენახვას, გამოყენებას, გავრცელებას ან ხელმისაწვდომობის სხვაგვარი უზრუნველყოფას, ასევე ინტერნეტით, მათ შორის, სოციალური ქსელის, მასობრივი მაუწყებლობის ან სხვა საჯარო გამოსვლის მეშვეობით გავრცელებას გულისხმობს. მუხლი სასჯელის სახით ოთხიდან შვიდ ან ხუთიდან რვა წლამდე თავისუფლების აღკვეთას ითვალისწინებს.

გამოძიების ფარგლებში 20 პირია დაკავებული. მათგან რამდენიმეს საქალაქო სასამართლომ აღკვეთის ღონისძიების სახით 5 000-ლარიანი გირაო შეუფარდა.