"ამას დავარქმევდი სამეგრელოში მომლოცველობას", — ასე შეაფასა ჭყონდიდის მიტროპოლიტმა პეტრემ სამეგრელოში ქართული ოცნების თავმჯდომარის, ბიძინა ივანიშვილის ჩასვლა.

გადაცემა რეაქციაში მეუფე პეტრემ ბიძინა ივანიშვილთან შეხვედრაზეც ისაუბრა. როგორც მან აღნიშნა, მას შეატყობინეს, რომ ბიძინა ივანიშვილის ჭყონდიდის ტაძრისა და ეპარქიის მოლოცვა სურდა. მიტროპოლიტის თქმით, მან ბიძინა ივანიშვილთან რამდენიმე საკითხზე ისაუბრა, მათ შორის ზვიად გამსახურდიას მკვლელობაზე.

გარდა ამისა, მეუფე პეტრემ აღნიშნა, რომ ბიძინა ივანიშვილს ე.წ. ციანიდის საქმის მსჯვარდებულზე, დეკანოზ გიორგი მამალაძეზე ესაუბრა, თუმცა საუბრის დეტალები არ გააჟღერა.

29 მარტს, ქართულო ოცნების თავმჯდომარე, ბიძინა ივანიშვილი სამეგრელოში ჩავიდა, სადაც სასულიერო პირებსაც შეხვდა. ამასთანავე ის ეწვია სოფელ ხიბულას, სადაც ზვიად გამსახურდიამ სიცოცხლის ბოლო წლები გაატარა, მოსახლეობას პრობლემების მოგვარებას დაჰპირდა. მან თქვა, რომ ბიუჯეტში თანხის არარსებობის შემთხვევაში ამ საკითხს საკუთარი ხარჯებით მოაგვარებს.

სოფელ ხიბულაში ვიზიტამდე ბიძინა ივანიშვილმა ზვიად გამსახურდიას იუბილესთან დაკავშირებით წერილი გაავრცელა, სადაც წერდა, რომ ქვეყნის სირცხვილია პირველი პრეზიდენტის მკვლელობის საქმის გამოუძიებლობა.

სამართლიანი არჩევნების ხელმძღვანელმა, მიხეილ ბენიძემ On.ge-სთან აღნიშნა, რომ თავისი შინაარსით ბიძინა ივანიშვილის განცხადება სოფელ ხიბულაში ამომრჩევლის მოსყიდვად შეიძლება ჩაითვალოს.