9 აპრილს, 15:00 საათზე საზოგადოებრივი მაუწყებლის შენობასთან კომპოზიტორ ჯემალ სეფიაშვილის მიერ შექმნილი სიმღერის ვაჩუქოთ ერთმანეთს ტიტები ახალ ვერსიას გააპროტესტებენ. ახალ ვერსიაში მხოლოდ კაცები მღერიან.

აქციის ორგანიზატორები საზოგადოებრივ მაუწყებელს მოუწოდებენ, 9 აპრილის ტრაგედიიდან 30 წლის თავზე ამ სიმღერის "უნამუსო პრეზენტაცია" ეთერში არ გაუშვან. ისინი 25 მომღერალ კაცსაც მიმართავენ, არ შეასრულონ ეს სიმღერა.

"მოვუწოდებთ ყველა ადამიანს, ვისთვისაც ის 17 ქალი ქვეყნის დაცვის სიმბოლოა, ნუ მიიღებთ ამ სამარცხვინო აბსურდის თეატრში მონაწილეობას, რადგან ეს არის იმ 17 ქალის და კიდევ უამრავი სხვა ქალის შეურაცხყოფა, რომლებმაც საკუთარი სამშობლოსთვის გაწირეს თავი", — ნათქვამია განცხადებაში.

9 აპრილის ტრაგედიიდან 30 წლის თავზე 25 მომღერალი სიმღერის ვაჩუქოთ ერთმანეთს ტიტები ახალ ვერსიას წერს. კომპოზიტორის, ჯემალ სეფიაშვილის განმარტებით, სიმღერას მხოლოდ კაცები შეასრულებენ, რადგან "ქვეყნის დამცველი კაცია". 9 აპრილს 21 მოკლულიდან 17 ქალი იყო.