საზოგადოებრივი მაუწყებელი გეგმავს, რომ სატელევიზიო აუდიტორიის კვლევა (ფიფლმეტრული მეთოდით) ორ კომპანიას დაუკვეთოს. არხს მიაჩნია, რომ ასე შესაძლებელი იქნება რეალური სურათის დანახვა. ჯამში მათი ბიუჯეტიდან 40 ათასი ლარის დახარჯვაა გადაწყვეტილი.

"იმისათვის, რომ საზოგადოებრივმა მაუწყებელმა სრულად ასახოს მედია ბაზარზე არსებული ტენდენციები, რაც სრულყოფილი პროგრამირების საშუალებას მოგვცემს. ასევე, იმისათვის, რომ საზოგადოებრივმა მაუწყებელმა უზრუნველყოს სარეკლამო მომსახურების ყველა დამკვეთის თანაბარ პირობებში ჩაყენება, აუცილებელია ორივე მთვლელის მომსახურების შესყიდვა", — განმარტავს საზოგადოებრივი მაუწყებელი შესყიდვების სააგენტოსთვის მიწოდებულ ინფორმაციში.

საზოგადოებრივი მაუწყებელი შპს ტრი მედია ინტელიჯენსისგან და შპს თი-ვი ემ-არ საქართველოსგან რეიტინგების დათვლის მომსახურების შესყიდვას პირველი აპრილიდან 31 დეკემბრის ჩათვლით გეგმავს. ბოლო რამდენიმე თვეა მაუწყებელი ორივე ამ კომპანიისგან სატესტო რეჟიმში მომსახურებას უფასოდ იღებდა. მანამდე ორი წლის განმავლობაში ტენდერში გამარჯვებული ტრი მედია ინტელიჯენსი იყო. ამ კომპანიის ბაზარზე შემოსვლამდე კი ტენდერებს თი-ვი ემ-არ საქართველო იგებდა.