დამოუკიდებელი დეპუტატი ეკა ბესელია ამბობს, რომ პირადი ცხოვრების კადრების გავრცელების შესახებ შინაგან საქმეთა სამინისტროს თავად აცნობა და უწყებას ინფორმაცია არ ჰქონდა.

"ჩემგან გაიგეს. რატომ გაიგეს ჩემგან? ჩვენს ქვეყანაში ჩვენი მოქალაქეები დაცულები უფრო მეტად უნდა იყვნენ თუ არა ასეთი რამით", — განაცხადა მან რუსთავი 2-თან.

დეპუტატი კადრების გავრცელებას მის მიერ განხორციელებულ პოლიტიკურ "შტურმს" უკავშირებს. "ესეც შემთხვევით ხდება", — კითხულობს ბესელია.

მისი თქმით, თუ ერთი თვის განმავლობაში პროკურატურისა და შინაგან საქმეთა სამინისტროსგან ვერ მიიღებს პასუხებს კითხვებზე, თუ ვინ არის ორივე შემთხვეავში კადრების გავრცელების დამკვეთი და ორგანიზატორი ის თავად დაარქმევს სახელს არსებულ სიტუაციას.

აღნიშნულთან დაკავშირებით On.ge ცდილობს შინაგან საქმეთა სამინისტროსთან დაკავშირებას.

პირადი ცხოვრების ამსახველი კადრების გავრცელების შესახებ 26 მარტს ღამით გახდა ცნობილი. სოციალურ ქსელ Youtube-ზე ეწერა, რომ ვიდეო ორი კვირის წინ აიტვირთა და მას დაახლოებით 5 000 ნახვა ჰქონდა.

შინაგან საქმეთა სამინისტროში განაცხადეს, რომ ვიდეოს ატვირთვის ბრალდებით არასრულწლოვანი დააკავეს.