იუსტიციის უმაღლესი საბჭოს არამოსამართლე წევრი, ანა დოლიძე ამბობს, რომ მთაწმინდის ოლქის შუალედურ არჩევნებში კენჭს არ იყრის. მანამდე სხვადასხვა მედიასაშუალებები წერდნენ, რომ დოლიძე შუალედურ არჩევნებში მიიღებდა მონაწილეობას. როგორც ის ფეისბუქზე წერს, ერთი წლის წინ, საბჭოს წევრობის მომენტიდან სამართლიანობისთვის ბრძოლა წამოიწყო.

"ახლა, როდესაც მიმდინარეობს უზენაესს სასამართლოში მოსამართლეების დანიშვნის პროცესი და ვდგავართ სერიოზული რისკის ქვეშ, რომ სამართლიანობას საბოლოოდ დაეპატრონება ერთი ჯგუფი მურუსიძე- ჩინჩალაძის სახელით, როგორც არასდროს სჭირდება ამ ბრძოლას ყველა ძალის კონცენტრირება, რომ მივიყვანოთ ბოლომდე", — წერს ანა დოლიძე.

მთაწმინდის საარჩევნო ოლქში არჩევნები 19 მაისს გაიმართება. მთაწმინდის მაჟორიტარი დეპუტატი მეცხრე მოწვევის პარლამენტში სალომე ზურაბიშვილი იყო. საპრეზიდენტო არჩევნებში გამარჯვების შემდეგ სალომე ზურაბიშვილს დეპუტატის უფლებამოსილება შეუწყდა და მთაწმინდის ოლქში შუალედური არჩევნები დაინიშნა.

უკვე ცნობილია, რომ მთაწმინდის ოლქში ევროპული საქართველოსა და თავისუფალი დემოკრატების ერთიანი კანდიდატი შალვა შავგულიძე იქნება. გარდა ამისა, კენჭს იყრის პარლამენტის ყოფილი დეპუტატი, კობა დავითაშვილი. ამასთანავე, შუალედურ არჩევნებში გირჩის კანდიდატი ჰერმან საბოა იქნება.