ქართულ ოცნებაში დაბრუნებული ყოფილი პრემიერი, ირაკლი ღარიბაშვილი ყოფილი პრეზიდენტის, მიხეილ სააკაშვილის ხელისუფლებას უფრო მეტი ტერიტორიის დაკარგვაში ადანაშაულებს. ამის შესახებ მან დღეს, ინგა გრიგოლიას გადაცემა რეაქციაში ისაუბრა.

"პრაქტიკულად შეიძლება ითქვას, რომ მივიღეთ ხელახალი ოკუპაცია", — ამბობს ღარიბაშვილი. იგი აცხადებს იმასაც, რომ გონიერი მმართველი "არ უნდა შემოუძღვეს რუსულ ჯარს":

"ნებისმიერ ქვეყანაში, ნორმალურ სახელმწიფოში, ხელისუფლებას, რომლის პირობებში ქვეყანა დაკარგავდა ტერიტორიებს, ასობით სოფლებს, მოქალაქეები დაიხოცებოდნენ, არათუ ხელისუფლებაში დარჩებოდა, არამედ, რიგ შემთხვევაში მათი პასუხისმგებლობის საკითხი დადგებოდა. როდესაც გაქვს პრეტენზია, რომ ხარ გონიერი მმართველი, შენ უნდა იყო ვალდებული, დაიცვა შენი მოქალაქეები და არ დაკარგო შენი სახელმწფოს ტერიტორიები. თავიდან უნდა აიცილო ის დიდი განსაცდელი, როგორიცაა ტერიტორიების ოკუპაცია".