რუსთავი 2-ში სტუმრობისას პაატა ბურჭულაძის პარტიის ყოფილმა წევრმა ხათუნა ლაგაზიძემ კიდევ ერთხელ დაადანაშაულა სახელმწიფო ხალხისთვის ლიდერი პარტიის, მისი წევრებისა და ამომრჩევლების გაყიდვაში.

"სია იყიდეს ნაციონალებმა. პაატა ბურჭულაძემ არამარტო სია გაყიდა, მან ასევე ივაჭრა საკუთარი სახელითა და ავტორიტეტით".

ხათუნა ლაგაზიძემ დასძინა, რომ სიაში მოხვდნენ ისინი, რომლებიც პავლე კუბლაშვილის მიმართ ლოიალობით გამოირჩეოდნენ.

ლაგაზიძის თქმით, მისთვის ასევე გაურკვეველია, რატომ არიან სიის ოცეულში მხოლოდ ის ადამიანები, რომლებსაც საგარეო და უსაფრთხოების საკითხებში მუშაობის გამოცდილება არ აქვთ. ის მიიჩნევს, რომ ეს კიდევ ერთხელ ადასტურებს იმას, რომ სიაში ადგილები გაიყიდა და ის პროფესიონალებით არ დაკომპლექტებულა:

"სია დაკომპლექტდა გაყიდვის და არა პროფესიონალიზმის პრინციპით".

იმავე გადაცემაში სტუმრობისას, პაატა ბურჭულაძის პარტიის სახელმწიფო ხალხისთვის ერთ-ერთმა წევრმა და საარჩევნო სიის მეხუთე ნომერმა ირაკლი ყიფიანმა განაცხადა, რომ ხათუნა ლაგაზიძე კონკურენციის გამო ვერ მოხვდა სიაში.