უზენაესი სასამართლოს მიერ რუსთავი 2-ის საქმის სარჩელის მიღებას საგანგებო ბრიფინგზე გამოეხმაურა ტელეკომპანიის გენერალური მდივანი ნიკა გვარამია.

გვარამიას თქმით, ის დარწმუნებული იყო, რომ აუცილებლად იარსებებდა გამონაკლისი და სასამართლოს ეყოფოდა გამბედაობა არ დაჰყოლოდა იმ წესს, რომელიც დღეს დაკვეთილი სასამართლო პროცესების სახით არსებობს.

მისივე თქმით, ეს არის დასტური იმისა, რომ ბრძოლას ყოველთვის აქვს აზრი და საზოგადოებამ, პოლიტიკურმა პარტიებმა, არასამთავრობო ორგანიზაციებმა და რუსთავი 2-მა გაიმარჯვეს.

გვარამიამ დადგენილების ერთ-ერთ მუხლზეც გაამახვილა ყურადღება, რომლის მიხედვითაც რუსთავი 2-ის სარჩელის განხილვა ზეპირი მოსმენის გარეშე მოხდება. მისი თქმით, რუსთავი 2-ის წარმომადგენლები შუამდგომლობით მიმართავენ სასამართლოს, რათა პროცესი, მაღალი საზოგადოებრივი ინტერესის გამო, ჩატარდეს ღიად.