ევროპული საქართველოს ლიდერის, გიგა ბოკერიას განცხადებით, უმრავლესობისგან დარგობრივი ეკონომიკის კომიტეტის თავმჯდომარეს, რომან კაკულიას ჰქონდა დაკვეთა, რომ თიბისი ბანკის საქმეზე ეროვნული ბანკის პრეზიდენტს ოპოზიციის კითხვებზე პასუხი არ გაეცა.

მისი თქმით, ასეთი ფაქტი, რომ პარლამენტს უარი ეთქვა საკუთარი უფლებამოსილების შესრულებაზე, დიდი ხანია არ მომხდარა. მისივე თქმით, ამ საკითხზე ოპოზიცია მუშაობას არ შეწვეტს, ვიდრე "ქართული ოცნების წევრები თავს არ მოიჭრიან".

"ბიძინა ივანიშვილი სამარცხვინო მდგომარეობაში აყენებს მათ, ვისაც ის იყენებს, დაწყებული ეროვნული ბანკით და უმრავლესობით. ამ საქციელით კიდევ უფრო ნათლად ჩანს, რაც პარლამენტის კომიტეტმა შეასრულა და არ მოგვცა კითხვები დაგვესვა და მოგვესმინა თიბისის ხელმძღვანელებისთვის. ეს არის კიდევ ერთი დემონსტრირება რომ პოლიტიკური დაკვეთა სრულდება ყველგან. ეს არის მძიმე რეალობა, მაგრამ უნდა გავაგრძელოთ, სანამ არ შეიცვლება ხელისუფლება", — თქვა ბოკერიამ.

დარგობრივი ეკონომიკის კომიტეტის სხდომა, სადაც თიბისი ბანკის საქმესა და ეროვნული ბანკის ახალ რეგულაციაზე უნდა ემსჯელათ, მსჯელობის გარეშე დასრულდა. 57 წუთის განმავლობაში დეპუტატები ფორმატზე შესათანხმებლად კამათობდნენ, თუმცა უშედეგოდ.