სახალხო დამცველი GDS-ის მიერ მომზადებულ გადაცემაში ბინა 18 23 აპრილს გასულ სიუჟეტს გამოეხმაურა და განმარტა, რომ იგი ჰომოფობიური განწყობების გაღვივებისა და დისკრიმინაციული ქმედებების წახალისებისკენაა მიმართული.

უჩა ნანუაშვილი მიიჩნევს, რომ ტელეკომპანიის ეთერში გავიდა სიუჟეტი, რომლის ავტორმაც, საზოგადოებრივი აზრის გამოკითხვის შედეგად, ჰომოფობიური გამონათქვამებითა და შეხედულებებით გაჯერებული სიუჟეტი შემოგვთავაზა აუდიტორიას. ომბუდსმენის თქმით, თავად სიუჟეტის ავტორიც არ ერიდება სიძულვილის ენის ტირაჟირებას:

"სიუჟეტის შინაარსობრივი მხარის შეფასებისას ნათლად გამოჩნდა საკითხის გაშუქებისადმი არაობიექტური მიდგომა მაშინ, როდესაც მედიასაშუალებებს შეუძლიათ დადებითი წვლილი შეიტანონ ისეთი ფასეულობების დამკვიდრებაში, რომლებიც ადამიანის ძირითადი უფლებებისა და თავისუფლებების პატივისცემას განაპირობებს".

სახალხო დამცველი განმარტავს, რომ სიტყვისა და გამოხატვის თავისუფლება ერთ-ერთი ფუნდამენტური უფლებაა, თუმცა, ლგბტ პირთა მიმართ არსებული დისკრიმინაციული განწყობების გათვალისწინებით, აღნიშნული საკითხების გაშუქება განსაკუთრებულ სიფრთხილეს საჭიროებს იმისთვის, რომ სტერეოტიპების გამყარება და ძალადობის წახალისება არ მოხდეს.

ომბუდსმენი ასევე მიიჩნევს, რომ ზემოაღნიშნული სიუჟეტის ავტორი ღიად გამოხატავდა სიძულვილს ლგბტ ადამიანების მიმართ, რესპოდენტებს ახსენებდა მის მიერ გაკეთებულ სიძულვილის ენის შემცველ განცხადებას და მათ ანალოგიური აზრის დაფიქსირებისკენ მოუწოდა:

"სიუჟეტის განმავლობაში ავტორი ლგბტ ადამიანებს მოიხსენიებს მცდარი ტერმინით -ერთსქესიანები".

ნანუაშვილის განმარტებით, ტელევიზიით გასული მსგავსი სიუჟეტი ხელს უწყობს უარყოფითი სტერეოტიპული შეხედულებების გაძლიერებას ლგბტ ადამიანების მიმართ და ახალისებს სხვადასხვა სფეროში დისკრიმინაციული მოტივით მათი უფლებების შეზღუდვას.

ომბუდსმენი განსაკუთრებით საგანგაშოდ მიიჩნევს იმ ფაქტს, რომ GDS-მა სიუჟეტის ავტორი სამუშაოდ მის მიერ გაკეთებული ჰომოფობიური გამონათქვამების შემდეგ მიიწვია.