ფეხბურთის ფედერაციის პრეზიდენტის არჩევნებში მონაწილე ერთადერთი კანდიდატი ლევან კობიაშვილი მეორე ვადით აირჩიეს. კობიაშვილი აცხადებს, რომ დაწყებული საქმის გაგრძელებას აპირებს და მზად არის დაძლიოს ის გამოწვევები, რომელიც ფედერაციის წინაშე დგას.

კობიაშვილმა უკონკურენტო არჩევნებზეც ისაუბრა და განაცხადა, რომ უმჯობესი იქნებოდა პროცესში სხვა პირებიც ჩართულიყვნენ. მისი თქმით, ეს საერთო საქმეს აზარალებს.

"ეს ჩემთვის კაი არ არის, საქმისთვის არ არის პირველ რიგში კაი. ბუნებრივია, რომ ყოფილიყო სხვა კანდიდატი გაცილებით უფრო კომფორტულად ვიგრძნობდი თავს. თუნდაც იქიდან გამომდინარე, რომ მსგავსი კითხვები არ დასმულიყო. შესაბამისად, რაც არის რეალობა ეს არის", — განაცხადა კობიაშვილმა და მოუწოდა სამომავლოდ სხვა კანდიდატებიც ჩაერთონ პროცესში.

პირველად კობიაშვილი პრეზიდენტად 2015 წელს აირჩიეს. მაშინ არჩევნებში სამი კანდიდატი მონაწილეობდა.

ლევან კობიაშვილი IX მოწვევის პარლამენტის დეპუტატია. ის პარლამენტში ქართული ოცნების მაჟორიტარული სიით მოხვდა.