გორის მაჟორიტარობის დამოუკიდებელმა დეპუტატმა ირაკლი ოქრუაშვილმა TV პირველში სტუმრობისას რუსთავი 2-თან დაკავშირებულ სამომავლო სამართლებრივი ბრძოლის ფორმებზე და ქიბარ ხალვაშის მიერ შესასრულებელ ვალდებულებებზე ისაუბრა:

"რუსთავი 2-თან დაკავშირებით, მე დავას არ ვაპირებ ქართულ სასამართლოებში, რადგან მშვენივრად მესმის, რომ ამ თემაზე შეუძლებელია რამე მიუკერძოებელი გადაწყვეტილების გამოტანა აქ. მე ამ თემაზე ვიდავებ ან პარიზში, ან ლონდონში. ის [ქიბარ ხალვაში] მიიღებს შესაბამის შეტყობინებას".

ოქრუაშვილი აცხადებს, რომ მან ხალვაშს 2015 წლის ნოემბერში DHL-ით გაუგზავნა ოფიციალური შეტყობინება, სადაც აფრთხილებდა, რომ მასთან შეუთანხმებელი მოქმედებების გამო გარკვეული ვალდებულებების შესრულება მოუწევდა:

"იგულისხმებოდა ვალდებულების შესრულება ჯარიმის გადახდის სახით, ესაა 7 მილიონი აშშ დოლარი, რომელზეც საუბარია კონტრაქტში".

ოქრუაშვილის თქმით, ხალვაშის მთავარი დარღვევა ის იყო, რომ რუსთავი 2-ის 100 %-იან წილიდან 50%-ის ჯარჯი აქიმიძისთვის და დავით დვალისთვის გადაფორმებას აპირებდა.