კაბელების საქმის ადვოკატის ლევან სამუშიას განცხადებით, ე.წ. კაბელების საქმეს გრიფით საიდუმლო ადევს და საქართველოს პარლამენტის თავმჯდომარემ კანონი დაარღვია, როცა თქვა, რომ "კაბელების საქმეში ჩაიხედა".

ადვოკატი მოუწოდებს საქართველოს პროკურატურას დაიწყოს გამოძიება ირაკლი კობახიძის განცხადებასთან დაკავშირებით. ამის შესახებ ადვოკატმა ტოქშოუ რეაქციაში განაცხადა.

ე.წ. კაბელების საქმეს გრიფი სრულად არ ადევს. საქმის მასალების დიდ ნაწილს 2014 წელს საიდუმლო გრიფი მოეხსნა. მთავარ პროკურატურაში გამართულ საგანგებო ბრიფინგზე მაშინ განაცხადეს, რომ გრიფით საიდუმლო საქმის მასალების მხოლოდ 7 პროცენტზე დარჩა.

ირაკლი კობახიძის განცხადებას დაუსაბუთებელს და არასწორს უწოდებს ე.წ. კაბელების საქმის კიდევ ერთი ადვოკატი სოსო ბარათაშვილი.

"ასეთი განცხადებები მხოლოდ აზიანებს მართლმსაჯულებას. საქმის ნაწილს ადევს გრიფით საიდუმლო. ეს არის ნაწილი, რომელიც საქმის, ფაქტობრივად, ერთ მხარეს მოიცავს. თუ ის არ გაცნობია სრულად საქმეს, არაკვალიფიციური განცხადებაა, თუ საქმეს სრულად გაეცნო, მათ შორის საიდუმლო მასალებს, მან უნდა ახსნას, საიდან ჰქონდა წვდომა საიდუმლო მასალებთან", — განაცხადა სოსო ბარათაშვილმა On.ge-სთან საუბრისას.

საქართველოს პარლამენტის თავმჯდომარემ ირაკლი კობახიძემ მოგვიანებით განმარტა, რომ მან საქმის ის მასალები შეისწავლა, რომელსაც გრიფით საიდუმლო არ ედო და მასზე დაყრდნობით გამოიტანა დასკვნა რეალური დამნაშავის დაუსჯელობის შესახებ. კობახიძის განმარტების შესახებ On.ge-ს ქართული ოცნების პრესსამსახურიდან აცნობეს.

On.ge დაუკავშირდა საქართველოს პროკურატურას და ელოდება პასუხს, დაინტერესდება თუ არა უწყება ირაკლი კობახიძის განცხადებით.

საქართველოს პარლამენტის თავმჯდომარემ ირაკლი კობახიძემ განაცხადა, რომ კაბელების საქმეზე "პასუხი არ უგია იმას, ვინც დანაშაული ჩაიდინა". მისი თქმით, ეს დასკვნა "საქმეში ჩახედვის" შემდეგ გამოიტანა.

კაბელების საქმე ეხება თავდაცვის სამინისტროს მიერ განხორციელებულ ე.წ. კაბელების პროექტს, რომლისთვისაც 2013 წელს სახელმწიფოს სარეზერვო ფონდიდან 6 720 877 ლარი გამოიყო, თუმცა პროკურატურის მტკიცებით, აღნიშნული პროექტის განხორციელებისათვის მხოლოდ 2 618 005 ლარი იყო საჭირო. სწორედ ამ რიცხვებს შორის სხვაობის - 4 102 872 ლარის გაფლანგვას ედავება პროკურატურა უკვე მსჯავრდებულ 5 პირს.

თბილისის საქალაქო სასამართლომ ე.წ. კაბელების საქმეზე თავდაცვის სამინისტროს 5 ყოფილი მაღალჩინოსანი 2016 წლის 16 მაისს ბიუჯეტის თანხების გაფლანგვაში დამნაშავედ ცნო და სასჯელად თავისუფლების 7 წლით აღკვეთა მიუსაჯა.

ე.წ. კაბელების საქმეზე მსჯავრდებული, თავდაცვის სამინისტროს ყოფილი მაღალჩინოსნები პრეზიდენტმა გიორგი მარგველაშვილმა 2017 წელს შეიწყალა.