იუსტიციის უმაღლესი საბჭოს არამოსამართლე წევრმა, ნაზი ჯანეზაშვილმა სიტყვით გამოსვლისას თქვა, რომ მოსამართლეთა დღევანდელ კონფერენციაზე განსხვავებული აზრი არ გაჟღერებულა.

"თქვენ არ უნდა გქონდეთ პრეტენზიები ჩემ მიმართ, მე და ანა დოლიძეც ვართ უმცირესობაში, ჩვენ ვერ ვიღებთ გადაწყვეტილებებს... ვნახე, რომ ტაშს უკრავთ ისეთ ადამიანებს, რომლებიც ზიანს აყენებენ სასამართლო სისტემას. ყველა ადამიანი გამოდის და ერთი და იგივე რამეს ამბობს. დღეს დავრწმუნდი, რომ ეს არის კლანი", — მიმართა ჯანეზაშვილმა მოსამართლეებს.

ჯანეზაშვილის სიტყვით გამოსვლას დარბაზში ხმაური მოჰყვა. მოსამართლეთა ნაწილი ითხოვდა, მისთვის მიკროფონი გაეთიშათ და ტრიბუნიდან ჩამოეყვანათ.

კონფერენციის ბოლოს მოსამართლეებმა საერთო განცხადება გაავრცელეს, სადაც ბოლო პერიოდში მართლმსაჯულების სისტემაში განვითარებულ მოვლენებს აფასებენ. მათ შორის, უზენაესი სასამართლოს მოსამართლეების არჩევის საკითხს.

მოსამართლეები აცხადებენ, რომ უნდა შეწყდეს ზეწოლა სასამართლო ხელისუფლებაზე და მიეცეს მას შესაძლებლობა მშვიდ გარემოში განაგრძოს საქმიანობა.