პაატა ბურჭულაძის პარტიის საარჩევნო ბლოკში შემავალი ახალი საქართველოს ლიდერი გიორგი ვაშაძე On.ge-სთან საუბარში აცხადებს, რომ ბურჭულაძის დაპირება სოციალური დახმარების მიმღებ მოქალაქეთა რაოდენობის გაორმაგების შესახებ არასწორად იყო აღქმული, თუმცა მიზნობრივი პროგრამებით საერთო პროგრამების ჩანაცვლებას გულისხმობდა:

"ჩვენი სოციალური პროგრამა ითვალისწინებს, რომ მიზნობრივი პროგრამები იყოს მეტი და საერთო პროგრამები იყოს ცოტა. ვგულისხმობთ იმას, რომ არის პროგრამები, რომლებიც შემოსავლიანებზე და არაშემოსავლიანებზე თანაბრად ნაწილდება.

ჩვენი დათვლებით, მილიონამდე გაიზრდება იმ ადამიანების რიცხვი, რომლებიც მიზნობრივ პროგრამებს მიიღებენ. ეს შეიძლება იყოს სოციალურად დაუცველების პროგრამა, ჯანდაცვის უფასო პროგრამები და ა.შ."

ვაშაძე On.ge-სთან საუბარში აცხადებს, რომ პაატა ბურჭულაძის ნათქვამი მისი "ზეპირი საუბრის დროს" არასწორად იყო აღქმული და ამას მოჰყვა ინტერპრეტაციები.

"საუბარი იყო მიზნობრივი დახმარებების ზრდაზე, რომ არა ყველა იღებდეს დახმარებას, არამედ ის ჯგუფები, ვისაც რეალურად უჭირს. რაც შეეხება მათ ორჯერ გაზრდას, დიახ, მათი რაოდენობა გაიზრდება, რადგან ვინც ყველაზე ნაკლებად შემოსავლიანია, ის მიიღებს როგორც ფინანსურ, ისე სხვა დახმარებას, ვინც ცოტა მეტ შემოსავლიანია, ის სხვა ტიპის დახმარებას მიიღებს და ა.შ.".

გიორგი ვაშაძე მიიჩნევს, რომ ბიუჯეტის სწორად გადანაწილების შემთხვევაში, ეს იდეა რეალურია.

გუშინ პაატა ბურჭულაძემ განაცხადა, რომ ხელისუფლებაში მოსვლის შემთხვევაში, იმ ადამიანების რიცხვს გაზრდის, რომლებიც სოციალურ დახმარებას იღებენ:

"ჩვენ გვაქვს გეგმა, რომ დღეს სოციალური დახმარება ეძლევა 500 000 ადამიანს, ჩვენ ამას გავხდით ერთ მილიონს".

ახალი მემარჯვენეების ლიდერი მამუკა კაციტაძე აცხადებს, რომ ბურჭულაძის განცხადება მექანიკური უზუსტობა იყო.