რუსეთში ჩატარებული კვლევის თანახმად, რომელსაც საშემოდგომო გარდატეხა რუსების ცნობიერებაში ჰქვია, წერს, რომ რუსეთის მოსახლეობაში ოფიციალური მოსკოვის საგარეო პოლიტიკის მხარდამჭერთა რიცხვი შემცირდა. ამის მიზეზად კვლევის ავტორები, სირიაში მიმდინარე საომარ მოქმედებებს, წარუმატებელ კოსმოსურ პროექტებსა და ჯაშუშურ სკანდალებს ასახელებენ.

სოციოლოგიური კვლევა მოიცავდა გამოკითხვას რუსეთის სხვადასხვა რეგიონში, ასევე, ფსიქოლოგიურ ტესტს ფოკუსჯგუფებში. მიღებული მონაცემები ლევადა ცენტრის კვლევებთან ერთად შეჯამდა.

კვლევის ავტორი სოციოლოგების, ეკონომისტებისა და ფსიქოლოგების ექვსკაციანი ჯგუფია. კვლევის მიხედვით, რუსეთის მოსახლეობაში, მნიშვნელოვნადაა გაზრდილი მოთხოვნა მშვიდობიან საგარეო პოლიტიკაზე. ამავე კვლევით, რუსების მნიშვნელოვანი ნაწილი, ასევე, გრძნობს პიროვნების პატივისცემისა და თავისუფლების დანაკლისს.

კვლევაში ნათქვამია, რომ მნიშვნელოვნადაა შეცვლილი რუსების დამოკიდებულება სახელმწიფოს მიმართ. გამოკითხულთა 94 პროცენტს სახელმწიფოს დახმარების იმედი არა აქვს. 68 პროცენტის აზრით, ხუთი წლის შემდეგ რუსეთი კიდევ უფრო ჩამორჩება განვითარებაში დასავლეთის ქვეყნებს, ხოლო მოსახლეობის თავისუფლება კიდევ უფრო შემცირდება. ამასთანავე გამოკითხულთა 76 პროცენტი მზად არის მხარი დაუჭიროს რეფორმებს, რომელიც ქვეყანას კრიზისიდან გამოიყვანს.

კვლევის ავტორები, მომავალში მასობრივი ცნობიერების შეცვლის სამ სცენარს განიხილავენ.

1. კონსოლიდაცია დროშის გარშემო — საერთაშორისო არენაზე ვითარების დაძაბვისა და საგარეო საფრთხის ზრდის შემთხვევაში მსგავსი კონსოლიდაცია ყველაზე რეალურ სცენარად ისახება.

2. დაბრუნება ანტიისტებლიშმენტურ პოპულიზმში — ეს სცენარი შესაძლებელია იმ შემთხვევაში, თუ ქვეყანაში არ გატარდება სერიოზული და მაშტაბური რეფორმები, ხოლო მოსახლეობის ეკონომიკური მდგომარეობა იგივე დარჩება.

3. მოქმედებათა განვითარების მესამე სცენარი, სახელმწიფოსა და მოსახლეობის უფრო მეტ და ხარისხიან კავშირს გულისხმობს. თუმცა მსგავსი სცენარი ჩამოთვლილთაგან ყველაზე ნაკლებადაა მოსალოდნელია, ვინაიდან, მისი განხორციელება საგარეო კონფლიქტების არარსებობასა და ეკონომიკური მდგომარეობის მკვეთრად გაუმჯობესებას გულისხმობს.

კვლევის ავტორებმა, 2011 წელს გამოაქვეყნეს კიდევ ერთი ნამუშევარი, რომელიც მოსახლეობის უკმაყოფილების ზრდასა და ღრმა პოლიტიკური კრიზისის მოლოდინს ეხებოდა. მართლაც, 2012 წლიდან, რუსეთში მრავალათასიანი მიტინგების პერიოდი დაიწყო. მოსახლეობა უკმაყოფილებას გამოთქვამდა საპარლამენტო და საპრეზიდენტო არჩევნებით.