საპატიმროს დატოვებიდან რამდენიმე დღეში დამამცირებელი და არაადამიანური მოპყრობისთვის ბრალდებული, მარნეულის ყოფილი მერი, თემურ აბაზოვი ქართული ოცნების ცენტრალურ ოფისში იყო მისული. შტაბში მისული აბაზოვის ვიდეოკადრები რუსთავი 2-მა გაავრცელა. შეხვედრის მიზეზებთან დაკავშირებით ყოფილმა მერმა ჟურნალისტებთან არ ისაუბრა.

თემურ აბაზოვი არაადამიანური მოპყრობის ბრალდებით მიმდინარე წლის 13 ივნისს დააკავეს მას შემდეგ, რაც სტუდია მონიტორის გამოძიება გავრცელდა. მასალაში ასახული იყო, რომ მოქალაქე, რომელმაც საქართველოს ყოფილ პრემიერს, ბიძინა ივანიშვილისა და მარნეულის მერს, თემურ აბაზოვს აგინა, ძალადობის მსხვერპლი გახდა.

"გავრცელდა ვიდეოები, სადაც ეს მოქალაქე ბოდიშს იხდის და სახეზე, სავარაუდოდ, შარდს ისვამს", - აღნიშნულია სტუდია მონიტორის მიერ გავრცელებულ მასალაში.

ამავე მოქალაქეზე ცემის ბრალდებით სისხლის სამართლებრივი დევნა დაიწყო პარლამენტის წევრის, პარტია ერთიანი ნაციონალური მოძრაობიდან — აზერ სულეიმანოვის, მარნეულის მუნიციპალიტეტის საკრებულოს წევრის, პარტია ქართული ოცნებიდან — რამინ ალახვერდიევის და მარნეულის მერის ნათესავის, მოქალაქე ე.გ-ს მიმართ.

აბაზოვი 13 დეკემბერს აღკვეთის ღონისძიება პატიმრობა 10 000-ლარიანი გირაოთი შეეცვალა.