თბილისის საქალაქო სასამართლომ არ დააკმაყოფილა გაერთიანებული ოპოზიციის მოთხოვნა, არჩეული პრეზიდენტის, სალომე ზურაბიშვილის რეგისტრაციიდან მოხსნასთან დაკავშირებით. გადაწყვეტილება მოსამართლე ნინო ბუაჩიძემ დღეს, 11 დეკემბერს გამოაცხადა.

საზოგადოებრივი მაუწყებლის ცნობით, მოსამართლის გადაწყვეტილების გამოცხადებას არ დაესწრნენ მოსარჩელეები, მათ დარბაზი პროტესტის ნიშნად დატოვეს. მოსამართლის დასაბუთებული გადაწყვეტილება და სამოტივაციო ნაწილი ცნობილი ხვალ გახდება.

ოპოზიციამ სასამართლოში სარჩელის წარდგენის მოტივად საარჩევნო კოდექსის 47-ე მუხლი — ამომრჩევლის მოსყიდვა დაასახელა.

ოპოზიციამ დღევანდელ სხდომაზე მტკიცებულებად ვიდეომასალები წარადგინა. მათ ასევე არგუმენტად მოჰყავთ 600 000 პირისთვის ვალების ჩამოწერის პროგრამა.