გაერთიანებული ოპოზიციის მხარდამჭერის თაკო ჩარკვიანის თქმით, თბილისის საკრებულოს პროტოკოლის ხელმძღვანელმა დავით მაჭავარიანმა უთხრა, რომ მან და მისმა ოჯახმა ქვეყანა უნდა დატოვოს. ამის შესახებ ჩარკვიანმა რუსთავი 2-ის ეთერში განაცხადა.

მისი თქმით, მაჭავარიანი ფიზიკურად ნამდვილად არ ძალადობდა, თუმცა მისი ოჯახის მისამართით შეურაცხმყოფელ სიტყვებს იყენებდა. ჩარკვიანმა თქვა, რომ ორშაბათს აქციას გეგმავს, სადაც მოითხოვს მაჭავარიანის მიერ თანამდებობის დატოვებას.

თბილისის საკრებულომ დაადასტურა, რომ ჩარკვიანზე თავდასხმის ვიდეოკადრებში ფიგურირებს დავით მაჭავარიანი. მათი პოზიციით, გავრცელებულ ვიდეომასალაში ჩანს, რომ საკრებულოს თანამშრომელი ჩხუბში მონაწილე პირებს აშველებს და ფიზიკურ შეურაცხყოფას არავის აყენებს.

დავით მაჭავარიანი თბილისის საკრებულოში, სხვადასხვა პოზიციებზე, 2007 წლიდან მუშაობს. "იგი გაწონასწორებული, მშვიდი და წესიერი ადამიანია", — აცხადებენ საკრებულოში.

შინაგან საქმეთა სამინისტრომ ამ ინციდენტში ბრალდებული სამი პირი ადმინისტრაციული წესით დააკავა, ხოლო ერთი სისხლის სამართლის წესით. სწორედ ადმინისტრაციული წესით დაკავებულ სამ პირს შორის იყო დავით მაჭავარიანი. ის სასამართლომ გაამართლა იმ არგუმენტით, რომ ინციდენტის მონაწილეებს აშველებდა.